GT vs RR Qualifier 2 Preview head to head : आयपीएल २०२६ च्या विजेतेपदाच्या शर्यतीतील अंतिम फेरीत पोहोचण्यासाठी आता केवळ एकच जागा शिल्लक राहिली आहे. या जागेवर ताबा मिळवण्यासाठी उद्या म्हणजेच शुक्रवारी संध्याकाळी ७:३० वाजता राजस्थान रॉयल्स आणि गुजरात टायटन्स यांच्यात ‘क्वालिफायर-२’ चा महामुकाबला खेळवला जाणार आहे. न्यू चंदीगड येथील मुल्लानपूर येथे होणाऱ्या या सामन्यातील विजेता संघ थेट रविवारी आरसीबीविरुद्ध फायनल लढत खेळेल. तत्पूर्वी या दोघांचा हेड टू हेड रेकॉर्ड कसा आहे? जाणून घेऊया.

गुजरातचा वरचष्मा; पण आरसीबीने उडवलाय धुव्वा!

आयपीएलच्या इतिहासात राजस्थान रॉयल्सविरुद्ध गुजरात टायटन्सचा रेकॉर्ड अत्यंत उत्कृष्ट राहिला आहे. दोन्ही संघांमध्ये आतापर्यंत एकूण १० सामने खेळवले गेले आहेत, ज्यापैकी ७ सामन्यांत गुजरातने बाजी मारली आहे, तर राजस्थानला केवळ ३ सामने जिंकता आले आहेत. मात्र, गुजरातचा संघ ‘क्वालिफायर-१’ मध्ये आरसीबीकडून ९२ धावांनी दारूण पराभूत होऊन येथे आला आहे. २५५ धावांचा पाठलाग करताना शुबमन गिलची सेना अवघ्या १६२ धावांवर गारद झाली होती. त्यामुळे गुजरातला आपल्या चुका सुधारून फायनलची ही दुसरी संधी कशीही करून सुधारावी लागेल.

राजस्थान रॉयल्सचा ‘विजयरथ’; वैभव सूर्यवंशी फॉर्ममध्ये!

Qualifier 2 is officially locked in! 🔒

One final hurdle to the summit clash 🎟️#TATAIPL | #Qualifier2 | #TheFinalLeap | #GTvRR pic.twitter.com/y73BAkfWXC

— IndianPremierLeague (@IPL) May 27, 2026

दुसरीकडे, राजस्थान रॉयल्सचा संघ ‘एलिमिनेटर’ सामन्यात सनरायझर्स हैदराबादचा ४७ धावांनी धुरळा उडवून पूर्ण आत्मविश्वासाने मैदानात उतरणार आहे. राजस्थानसाठी सध्या १५ वर्षांचा वंडर बॉय वैभव सूर्यवंशी कमालीच्या फॉर्ममध्ये आहे, ज्याने हैदराबादविरुद्ध अवघ्या २९ चेंडूंत ९७ धावांची ऐतिहासिक खेळी केली होती. त्याला ध्रुव जुरेलच्या (२१ चेंडूंत ५० धावा) वादळी फलंदाजीची उत्तम साथ लाभली आहे.

हेही वाचा – Match Officials Announce : महिला टी-२० वर्ल्ड कपसाठी आयसीसीने जाहीर केलं ‘मॅच ऑफिशियल्स’चं पॅनेल! ४ भारतीय रणरागिणींना मिळाली संधी

गोलंदाजी विरूद्ध कमकुवत मिडिल ऑर्डर!

राजस्थानची गोलंदाजी सध्या भक्कम स्थितीत आहे. जोफ्रा आर्चर , नांद्रे बर्गर, सुशांत मिश्रा आणि रवींद्र जडेजा यांनी मागच्या सामन्यात उत्तम कामगिरी केली होती. याउलट गुजरातची फलंदाजी आणि गोलंदाजी दोन्ही चिंतेचा विषय आहे. मागच्या सामन्यात साई सुदर्शन आणि कर्णधार शुबमन गिल फ्लॉप ठरले होते, तर गोलंदाजीत मोहम्मद सिराज आणि कागिसो रबाडा महागडे ठरले होते. प्रसिद्ध कृष्णा आणि जेसन होल्डरही महागडे ठरले होते. अशा स्थितीत गुजरात या आव्हानाचा सामना कसा करतो, हे पाहणे रंजक ठरेल.