नेवासा : शासनाच्या घरकुल योजनेतील लाभार्थ्यांना प्रत्येकी पाच ब्रास वाळू मोफत देण्याची नवी योजना महसूल विभागाने अंमलात आणलेली असताना नेवासा तालुक्यात ही योजना मात्र फोल ठरली जात आहे. तालुक्यातील घरकुल लाभार्थ्यांना मोफत वाळू देण्याचे नियोजन आखण्यासाठी कधी जिल्हाधिकाऱ्यांच्या दालनात? तर कधी प्रांताधिकाऱ्यांच्या दालनात? बैठकांवर बैठकांचा सिलसिल्ला चालू असला तरी अद्यापपर्यंत नेवासा तालुक्यातील घरकुल लाभार्थ्यांना वाळूचा एक खडा देखील पदरात पडलेला नाही.

प्रत्यक्षात मात्र अनेक मंजूर घरकुलधारकांनी पाऊसाच्या भितीमुळे पदरमोड करुन घरुबांधणीसाठी अवैद्ध वाळू चढ्या भावाने विकत घेत असताना महसूल विभाग माञ अद्यापही ‘वराती मागून घोडे’ दामटण्याचे सोंग करण्याच्या प्रयत्नात असल्यामुळे महसूल विभागाच्या या अनागोंदी कारभाराचा फटका आता तालुक्यातील घरकुल लाभधारकांना बसत आहे. यामुळे शासनाच्या या स्त्युत योजनेचा फज्जा उडाल्याचे चित्र नेवासा महसूल विभागात दिसून येत आहे.

याबाबत अधिक सविस्तर वृत्त असे की, शासनाच्या नियम व चौकटीत नेवासा तालुक्यात वाळू उपशाला ग्रामस्थांचा तीव्र विरोध होत असल्यामुळे शासनाच्या नियमाप्रमाणे कागदोत्री वाळू लिलाव होत नाही. तसेच महसूल विभागाने अवैद्धरित्या जप्त केलेल्या वाळूची माती झालेली असल्यामुळे आता जवळपास नेवासा तालुक्यातील नविन तीन हजार घरकुलधारकांना ही प्रत्येकी पाच ब्रास वाळू कशी उपलब्ध करायची? याबाबत महसूल विभागात आता दररोज मंथन सुरु असून बैठकांवर बैठकांचा जोर शासकिय पातळीवर मोठा वाढत चाललेला आहे.

त्यामध्येच आता नेवासा तालुक्यात एकही वाळू डेपो नाही, ग्रामस्थांचा वाळू लिलावास मोठा विरोध आहे मग तालुक्यातील घरकुल लाभधारकांसाठी नगर किंवा श्रीरामपूर तालुक्यातून नेवाशात वाळू आणता येईल का? याबाबतही महसूल विभाग नवी शक्कल लढवितांना दिसून आहे. मात्र, अद्यापपर्यंत महसूल यंत्रणेला याचा फैसलाच करता न आल्यामुळे पुन्हा गुरुवार (दि. २९) रोजी नगर येथे प्रांताधिकाऱ्यांच्या दालनात याबाबत तोडगा काढण्यासाठी बैठक बोलविण्यात आलेली आहे.

तर दुसरीकडे मात्र प्रत्यक्षात पाऊसाच्या भीतीमुळे गोरगरीब घरकुल लाभधारकांचे बांधकामे अर्धवट स्वरुपात उभे असल्यामुळे “शासनाचे काम अन् सहा महीणे थांब” असा कटू अनुभव घरकुल लाभधारकांना येतांना दिसत आहे. महसूलच्या अनागोंदी कारभाराचा फटका मात्र घरकुल लाभधारकांना बसतांना दिसून येत असून, नेवासा तहसिलदार डॉ. संजय बिरादार आता नेवासा तालुक्यातील घरकुल लाभधारकांना मोफत वाळू देण्यासाठी काय उपाययोजना करणार ? याकडे तालुक्यातील घरकुलधारकांचे लक्ष लागून आहे.

घरकुल लाभधारकांवर अन्याय नाही का?

महसूल विभागाच्या आदेशानुसार घरकूल लाभार्थ्यांना प्रत्येकी पाच ब्रास तर अन्य बांधकामासाठी तेराशे रुपये ब्रासप्रमाणे महिन्यातून एकदा १० ब्रास वाळू मिळणार आहे. यातून वाळूचा अवैध उपसा, वाळू चोरी आणि त्यातून होणारे गुन्हे थांबतील अशी अपेक्षा आहे. मात्र नियमाप्रमाणे शासनाच्या घरकुल लाभधारकांना वाळू मिळण्यासाठी प्रयत्न केले जात असताना दुसरीकडे अवैद्ध वाळू उचलण्याचे काम सुरु झाल्यामुळे हा घरकुल लाभधारकांवर अन्याय नाही का, असा संतप्त सवाल उपस्थित केला जात आहे.