Gold Silver Prices Today: देशांतर्गत सराफा बाजारात सोन्या-चांदीच्या किमतींनी दररोज नवनवे विक्रम प्रस्थापित करण्याचा धडाका लावला आहे. बुधवारी दिल्लीच्या सराफा बाजारात सोन्याच्या भावात प्रति १० ग्रॅम तब्बल ६,५०० रुपयांची वाढ झाली, तर चांदीनेही ११,३०० रुपयांची मोठी झेप घेत गुंतवणूकदारांचे लक्ष वेधून घेतले आहे. या दरवाढीमुळे सामान्य ग्राहकांच्या खिशाला चांगलीच कात्री लागणार आहे.

सोन्याचा नवा ऐतिहासिक टप्पा
‘ऑल इंडिया सराफा असोसिएशन’ने दिलेल्या माहितीनुसार, ९९.९ टक्के शुद्धता असलेल्या सोन्याचा भाव ४.२४ टक्क्यांनी वधारून १,५९,७०० रुपये प्रति १० ग्रॅम या ऐतिहासिक पातळीवर पोहोचला आहे. विशेष म्हणजे, मंगळवारीच सोन्याने १.५ लाखांचा टप्पा ओलांडला होता. सलग दोन दिवसांच्या या तुफानी तेजीमुळे सोन्याचे दर आता १.६० लाखांच्या उंबरठ्यावर उभे आहेत.

चांदीची सलग ९ व्या दिवशी विक्रमी आगेकूच
चांदीच्या दरात सलग नवव्या दिवशी दरवाढ नोंदवण्यात आली. बुधवारी स्थानिक बाजारात चांदीचा भाव ११,३०० रुपयांनी वाढून ३,३४,३०० रुपये प्रति किलो या नव्या विक्रमी स्तरावर पोहोचला. मंगळवारी चांदीच्या दरात एकाच दिवसात २०,४०० रुपयांची ऐतिहासिक वाढ झाली होती, जी आतापर्यंतची सर्वात मोठी वाढ मानली जात आहे.

आंतरराष्ट्रीय बाजारातील कारणे-

जागतिक स्तरावर निर्माण झालेली राजकीय आणि आर्थिक अस्थिरता या दरवाढीला कारणीभूत ठरत आहे. जागतिक तणावामुळे सुरक्षित गुंतवणूक म्हणून सोन्याकडे कल वाढला आहे. अमेरिका आणि युरोपियन युनियन यांच्यात ग्रीनलँडवरून निर्माण झालेला तणाव जागतिक बाजारपेठेवर परिणाम करत आहे. आंतरराष्ट्रीय बाजारात सोने पहिल्यांदाच ४,८०० डॉलर प्रति औंसच्या पुढे गेले असून हाजीर चांदीचा भावही विक्रमी ९५ डॉलरच्या आसपास व्यापार करत आहे.

तज्ज्ञांचे मत –
बाजार विश्लेषकांच्या मते, रुपयाची घसरण, पुरवठ्यातील कमतरता आणि गोल्ड ईटीएफमधील (Gold ETF) वाढती गुंतवणूक यामुळे देशांतर्गत बाजारात सोन्या-चांदीचे भाव आंतरराष्ट्रीय किमतींच्या तुलनेत अधिक प्रीमियमवर चालत आहेत. भू-राजकीय तणाव असाच राहिल्यास नजीकच्या काळात किमती आणखी वाढण्याची शक्यता नाकारता येत नाही.