मुंबई – गुरुवारी (3 एप्रिल 2025) सोन्याने पुन्हा एकदा नवी उंची गाठली. दिल्लीच्या सराफा बाजारात सोन्याचा भाव 200 रुपयांनी वाढून 94,350 रुपये प्रति 10 ग्रॅमवर पोहोचला. ज्वेलर्स आणि गुंतवणूकदारांच्या खरेदीमुळे भारतीय बाजारात सोन्याला आधार मिळाला, पण आंतरराष्ट्रीय बाजारात मुनाफावसुलीमुळे किंमतीत घसरण दिसली. चांदी मात्र 1,000 रुपयांनी घसरून 1,00,500 रुपये प्रति किलोवर आली.

भारतीय बाजारात सोन्याची स्थिती –

ऑल इंडिया सराफा असोसिएशननुसार, 99.9% शुद्ध सोनं 200 रुपयांनी वाढून 94,350 रुपये, तर 99.5% शुद्ध सोनं 93,900 रुपये प्रति 10 ग्रॅमवर पोहोचलं. ज्वेलर्सच्या सातत्यपूर्ण खरेदीमुळे ही तेजी दिसली. एमसीएक्सवर जून डिलिव्हरी सोनं 695 रुपयांनी वाढून 91,423 रुपये झालं, पण नंतर 848 रुपयांनी घसरून 89,880 रुपयांवर स्थिरावलं.

आंतरराष्ट्रीय बाजारात चढ-उतार –

जागतिक बाजारात स्पॉट गोल्ड 43.39 डॉलर (1.38%) घसरून 3,089.64 डॉलर प्रति औंसवर आलं. बुधवारी ते 3,167.71 डॉलरच्या विक्रमी पातळीवर होतं. ट्रम्प यांच्या 60 देशांवरील नव्या टॅरिफमुळे ही अस्थिरता दिसली. एचडीएफसी सिक्युरिटीजचे विश्लेषक सौमिल गांधी म्हणाले, “टॅरिफच्या निर्णयामुळे जोखीम टाळण्यासाठी सोन्याची मागणी वाढली, पण नंतर मुनाफावसुली झाली.”

पुढील ट्रेंड काय? –

एलकेपी सिक्युरिटीजचे जतिन त्रिवेदी म्हणाले, “सोन्याने सुरुवातीला तेजी दाखवली, पण मुनाफावसुलीमुळे घसरण झाली. अमेरिकेचे नॉन-फार्म पेरोल आणि बेरोजगारी डेटा दिशा ठरवतील. कॉमेक्सवर 3,150 डॉलरवर अडथळा आहे, तर 3,080 डॉलर आधार आहे. खाली गेल्यास 3,000 डॉलरपर्यंत घसरण शक्य आहे. भारतात एमसीएक्सवर 91,000 रुपये अडथळा आणि 89,800 रुपये आधार आहे. खाली गेल्यास 88,000 रुपये शक्य.”

कशावर अवलंबून आहे बाजार? –
अबांस फायनान्शिअलचे चिंतन मेहता म्हणाले, “ट्रम्प यांच्या टॅरिफ नीतीचा जागतिक अर्थव्यवस्थेवर परिणाम आणि अमेरिकेचा बेरोजगारी डेटा बाजाराची दिशा ठरवेल. अनिश्चितता कायम राहिल्यास सोन्यात गुंतवणूक वाढू शकते, ज्याने किंमतीत मजबुती येईल.”

दरम्यान, 1 एप्रिल रोजी एकाच दिवसात सोन्याचे दर 2 हजार रुपयांनी वाढले होते. त्यामुळे ते आता 1 लाख रुपये 10 ग्रामजवळ पोहोचत आहे.

यापुढे आणखी वाढणार की कमी होणार?