Foreign exchange reserves : भारताच्या परकीय चलन साठ्यात अवघ्या एका आठवड्यात तब्बल 44.903 अब्ज डॉलरची विक्रमी वाढ झाली आहे. त्यामुळे 4 सप्टेंबर रोजी संपलेल्या आठवड्यात देशाचा परकीय चलन साठा 785.706 अब्ज डॉलर या नव्या सर्वकालीन उच्चांकावर पोहोचला आहे. भारतीय रिझर्व्ह बँकेने ही माहिती दिली.

याआधीच्या आठवड्यातही परकीय चलन साठ्यात 11.475 अब्ज डॉलरची वाढ झाली होती. त्यावेळी साठा 740.803 अब्ज डॉलरवर पोहोचला होता. वर्षाच्या सुरुवातीला पश्चिम आशियातील संघर्षामुळे रुपयावर दबाव वाढला होता. त्यामुळे रुपयाला आधार देण्यासाठी आरबीआयला डॉलरची विक्री करून परकीय चलन बाजारात हस्तक्षेप करावा लागला होता. परिणामी परकीय चलन साठ्यात घट झाली होती.

मात्र, रुपयाचे मूल्य मोठ्या प्रमाणात घसरल्यानंतर आरबीआयने जूनमध्ये सवलतीच्या दरातील परकीय चलन स्वॅप योजना जाहीर केली. त्यानंतर परकीय चलन साठ्यात वाढ सुरू झाली. या उपक्रमामुळे 136 अब्ज डॉलरपेक्षा अधिक नवीन प्रवाह निर्माण झाला आहे.

डॉलरच्या तुलनेत मोजल्या जाणाऱ्या परकीय चलन मालमत्तेवर युरो, पाउंड आणि येन यांसारख्या इतर चलनांच्या मूल्यवाढीचा किंवा घसरणीचा परिणाम होतो.

दरम्यान, या आठवड्यात सोन्याच्या साठ्याचे मूल्य 2.594 अब्ज डॉलरने घटून 113.816 अब्ज डॉलर झाले. आंतरराष्ट्रीय नाणेनिधीमधील (आयएमएफ) भारताची राखीव स्थिती 2 दशलक्ष डॉलरने वाढून 4.916 अब्ज डॉलर झाली.

तरीही रुपया घसरला –

परकीय चलन साठ्यात विक्रमी वाढ झाली असली तरी रुपयाची घसरण कायम आहे. कच्च्या तेलाच्या किमतींच्या दबावामुळे रुपया डॉलरच्या तुलनेत 5 पैशांनी घसरून 95.57 वर स्थिरावला.

एचडीएफसी सिक्युरिटीजचे वरिष्ठ संशोधन विश्लेषक दिलीप परमार यांच्या मते, वाढत्या रोखे परताव्यामुळे रुपयावर दबाव कायम आहे. दरम्यान, डॉलर निर्देशांक 0.09 टक्क्यांनी वाढून 99.13 वर व्यवहार करत होता. ब्रेंट कच्च्या तेलाचा वायदा 3.28 टक्क्यांनी घसरून 104.10 डॉलर प्रति बॅरलवर होता.