मुंबई: भारतीय सराफा व्यापाऱ्यांसाठी सध्या ‘अच्छे दिन’ आल्याचे चित्र आहे. कारण गेल्या काही काळात भारतातून होणाऱ्या रत्नं आणि दागिन्यांच्या निर्यातीत लक्षणीय भर पडली आहे. ही निर्यात सप्टेंबर 2021 मध्ये 29.67 टक्क्यांनी वाढून 23,259.55 कोटी रुपये झाली.

जेम्स अँड ज्वेलरी एक्सपोर्ट प्रमोशन कौन्सिलकडून (जीजेईपीसी) शनिवारी ही माहिती देण्यात आली. वर्षभरापूर्वी याच महिन्यात हा आकडा 17,936.86 कोटी रुपये होता. त्याच वेळी, सप्टेंबर 2019 मध्ये 23,491.20 कोटी रुपयांची रत्नं आणि दागिने निर्यात झाली होती.

आता सणांचा हंगाम आहे. अशा परिस्थितीत जीजेईपीसीला आर्थिक वर्षाच्या अखेरीपर्यंत निर्यातीचे लक्ष्य गाठण्याची आशा आहे. कट आणि पॉलिश केलेल्या हिऱ्यांची निर्यात (सीपीडी) एप्रिल-सप्टेंबर, 2021 मध्ये 122.62 टक्क्यांनी वाढून 91,489.2 कोटी रुपये झाली. गेल्यावर्षी याच कालावधीत हे 41,095.89 कोटी रुपये इतकी होती.

चालू आर्थिक वर्षाच्या पहिल्या सहा महिन्यांत, एप्रिल-सप्टेंबरमध्ये, रत्नं आणि दागिन्यांची निर्यात मागील आर्थिक वर्षाच्या याच कालावधीच्या तुलनेत 134.55 टक्क्यांनी वाढून 1,40,412.94 कोटी रुपये झाली.

एप्रिल-सप्टेंबरमध्ये 1,40,412.94 कोटी किंवा 18.98 अब्ज रुपयांच्या निर्यातीसह, रत्ने आणि दागिने क्षेत्राने $ 41.66 अब्ज डॉलर्स या निर्यात उद्दिष्टाच्या जवळपास निम्मे (सुमारे 46 टक्के) लक्ष्य साध्य केले आहे. लॉकडाऊननंतर बाजारपेठा उघडल्याने आणि हळूहळू मागणी सामान्य झाल्यामुळे व्यापारात वाढ झाल्याचे मत जीजेईपीसी अध्यक्ष कोलिन शहा यांनी व्यक्त केले.

सोन्याच्या दागिन्यांची निर्यात 262.66 टक्क्यांनी वाढून एप्रिल-सप्टेंबरमध्ये 8,100.97 कोटी रुपयांवरून 29,379.36 कोटी रुपये झाली. या कालावधीत चांदीच्या दागिन्यांची निर्यात 48.25 टक्क्यांनी वाढून 9,477.39 कोटी रुपयांवर पोहोचली, जी गेल्यावर्षी 6,392.65 कोटी रुपये इतकी होती.