Milk Price Hike : दूध उत्पादक शेतकऱ्यांना दिलासा देताना ग्राहकांच्या खिशाला झळ बसणार असा महत्त्वाचा निर्णय गोकूळ दूध महासंघाने घेतला आहे. संचालक मंडळाच्या बैठकीत दूध खरेदी दर वाढवण्यास मंजुरी देण्यात आली असून नवे दर आज शुक्रवार संध्याकाळपासून लागू करण्यात आले आहेत. महासंघाने म्हैस आणि गायीच्या दुधाच्या खरेदी दरात वाढ जाहीर केली आहे. म्हशीच्या दुधासाठी प्रतिलिटर १ रुपयांची वाढ करण्यात आली आहे. यापूर्वी ५२ रुपये ५० पैशांनी खरेदी होणारे दूध आता ५३ रुपये ५० पैशांनी खरेदी केले जाणार आहे. तर गायीच्या दुधासाठी प्रतिलिटर २ रुपयांची वाढ करण्यात आली असून ३४ रुपयांवरून दर ३६ रुपये प्रतिलिटर करण्यात आला आहे. खरेदी दरवाढीसोबतच विक्री दरातही वाढ करण्यात आली आहे. म्हशीच्या दुधाच्या विक्री दरात २ रुपयांची वाढ करण्यात आली असून ६८ रुपयांवरून दर ७० रुपये प्रतिलिटर करण्यात आला आहे. त्यामुळे सर्वसामान्य ग्राहकांना आता दुधासाठी अधिक पैसे मोजावे लागणार आहेत. आगामी निवडणुकांच्या पार्श्वभूमीवर दूध उत्पादकांना आर्थिक दिलासा देण्याच्या उद्देशाने हा निर्णय घेतल्याचे बोलले जात आहे. मात्र, वाढीव दरांचा थेट परिणाम ग्राहकांच्या घरगुती बजेटवर होणार असून बाजारातही त्याची चर्चा सुरू झाली आहे.
