Gokhale Nagar Murder – कॉमन गर्लफ्रेंडवरून सुरू असलेल्या वादाचे पर्यवसान एका तरुणाच्या निर्घृण हत्येत झाले. गोखलेनगर परिसरात घराबाहेर रिक्षात बसलेल्या २२ वर्षीय हर्ष जाधव याला त्याच्याच दोन जवळच्या मित्रांनी जबरदस्तीने बाहेर ओढून बेसबॉल स्टिकने बेदम मारहाण केली. गंभीर जखमी झालेल्या हर्षचा उपचारादरम्यान मृत्यू झाला. याप्रकरणी चतु:श्रृंगी पोलिसांनी दोन आरोपींना ताब्यात घेतले आहे.

पोलिसांनी दिलेल्या माहितीनुसार, मृत हर्ष जाधव आणि आरोपी हे एकमेकांचे जवळचे मित्र होते. मात्र, एका तरुणीशी हर्षच्या मित्राचे आणि एका आरोपीचे असे दोघांचेही संबंध असल्याने गेल्या सहा महिन्यांपासून त्यांच्यात सातत्याने वाद सुरू होता. दोन दिवसांपूर्वी हर्षने मद्यधुंद अवस्थेत आरोपीच्या घरी जाऊन कुटुंबीयांसमोर गोंधळ घालत जीवे मारण्याची धमकी दिली होती. त्याचाच राग मनात धरून आरोपींनी हर्षला धडा शिकवण्याचा कट रचल्याचे प्राथमिक तपासात समोर आले आहे.

घटनेच्या दिवशी पहाटे दोन ते तीनच्या सुमारास हर्ष आपल्या घराबाहेर रिक्षामध्ये बसला होता. त्या वेळी तेथे आलेल्या दोन ते तीन तरुणांनी हर्षला रिक्षातून बाहेर ओढून बेसबॉल स्टिकने मारहाण केली. मारहाणीत हर्षच्या कानावर जोरदार वार झाल्याने मोठ्या प्रमाणात रक्तस्राव झाला. हर्ष रक्ताच्या थारोळ्यात पडल्याचे पाहून आरोपी घटनास्थळावरून पसार झाले. आरडाओरड्याचा आवाज ऐकून परिसरातील नागरिक बाहेर आले. त्यांनी त्याला तातडीने रुग्णालयात दाखल केले. मात्र, उपचार सुरू असतानाच त्याचा मृत्यू झाला.

चतु:श्रृंगी पोलीस ठाण्याचे वरिष्ठ पोलीस निरीक्षक उत्तम भजनावले यांनी सांगितले, हल्ला झाला त्या परिसरात सीसीटीव्ही कॅमेरे नसल्याने तपासात अडचणी आल्या, तरीही तांत्रिक तपासाच्या आधारे दोन आरोपींची ओळख पटवून त्यांना ताब्यात घेतले आहे. दरम्यान, परिमंडळ दोनचे पोलीस उपायुक्त रजनीकांत चिलीमुला यांनी सांगितले, की कॉमन गर्लफ्रेंडवरून मृत आणि आरोपींमध्ये दीर्घकाळ वाद सुरू होता.