Genelia And Riteish: रितेश देशमुख आणि जिनिलीया देशमुख ही जोडी मनोरंजनविश्वातील आदर्श जोडप्यांपैकी एक मानली जाते. जवळपास दहा वर्षांच्या रिलेशनशिपनंतर ३ फेब्रुवारी २०१२ रोजी या दोघांनी कुटुंबीयांच्या संमतीने लग्न केलं. मात्र, या दीर्घ काळातही त्यांनी लग्नाआधी एकत्र राहणं टाळलं, असा खुलासा त्यांनी नुकताच केला आहे.

अलीकडेच सानिया मिर्झाच्या पॉडकास्टमध्ये सहभागी होताना जिनिलीया आणि रितेश यांनी त्यांच्या नात्याबद्दल मोकळेपणाने संवाद साधला. जिनिलीया म्हणाली, “आमचं नातं बर्‍याच काळ लाँग डिस्टन्स होतं. मी साऊथ चित्रपटांमध्ये व्यस्त होते, तर रितेश त्याच्या प्रोजेक्ट्समध्ये गुंतलेला असायचा. त्यामुळे आम्हाला फारसा वेळ एकमेकांसोबत घालवता यायचा नाही. भेटी कमी असल्या तरी आम्ही एकमेकांना समजून घेत होतो आणि करिअरवर लक्ष केंद्रित केलं होतं.”

यावर रितेश देशमुख म्हणाला, “आम्ही दहा वर्षं एकमेकांना डेट करत होतो, पण लग्नाआधी कधीच एकत्र राहिलो नाही. फिरायला जायचो, शूटिंगसाठी एकाच ठिकाणी असायचो, पण आमच्या रूम्स नेहमी वेगवेगळ्या असायच्या. मित्रमंडळींसोबतच आम्ही ट्रिप्स करायचो. लग्न झाल्यानंतरच पहिल्यांदा आम्ही एकत्र राहायला सुरुवात केली आणि तेव्हाच एका नव्या आयुष्याची खरी सुरुवात झाली.”

रितेशने याआधी एका मुलाखतीत सांगितलं होतं की, डेटिंगच्या काळात पापाराजींकडून सतत प्रश्न विचारले जायचे. “आम्ही तेव्हा सगळ्यांना ‘We are just good friends’ असंच सांगायचो. लग्नानंतरही पहिल्यांदा मीडियासमोर गेलो तेव्हा मी तेच उत्तर दिलं होतं,” असं त्याने हसत सांगितलं.

दरम्यान, वर्कफ्रंटबद्दल सांगायचं झालं तर, रितेश आणि जिनिलीया लवकरच ‘राजा शिवाजी’ या चित्रपटातून प्रेक्षकांच्या भेटीला येणार आहेत. या सिनेमाचं दिग्दर्शन स्वतः रितेश करणार असून जिनिलीया निर्मातीच्या भूमिकेत आहे. १ मे २०२६ रोजी हा सिनेमा संपूर्ण देशभरात प्रदर्शित होणार आहे.