प्रभात वृत्तसेवा बारामती – ज्येष्ठ नेते शरद पवार हे आपले मार्गदर्शक व गुरु आहेत, अशा शब्दांत अदानी समूहाचे अध्यक्ष गौतम अदानी यांनी पवार यांच्याविषयी आदरभाव व्यक्त करीत गौरवोद्गार काढले. यावेळी माझे मेंटॉर या शब्दांत अदानी यांनी भाषणाचा प्रारंभ केल्यानंतर सभागृहात टाळयांचा कडकडाट झाला.बारामती येथे विद्या प्रतिष्ठान शरदचंद्र पवार सेंटर ऑफ एक्सलेन्स इन आर्टिफिशियल इंटेलिजेन्सचे उदघाटन रविवारी (दि. 28) गौतम अदानी व अदानी फाउंडेशनच्या प्रमुख प्रीती अदानी यांच्या हस्ते करण्यात आले. त्याप्रसंगी ते बोलत होते. दरम्यान, बारामतीत एकाच व्यासपीठावर शरद पवार आणि गौतम अदानी हे येणार असल्याने देशाचे लक्ष वेधले होते. शरद पवार आणि अदानी यांच्यातील मैत्रीपूर्ण संबंध तसेच अजित पवार यांची दिल्लीतील निवासस्थानी शरद पवार यांची दोनवेळा घेतलेली भेट, इंडिया आघाडीतील शरद पवार यांचा सहभाग यावरून या कार्यक्रमाची उत्सुकता लागली होती. अर्ध्या तासाच्या भाषणात अदानी यांनी पवार यांच्या कार्यकतृत्वाचे पैलू उलगडत देशाच्या राजकीय, कृषी, सहकार, ग्रामीण अर्थकारणातील महत्व अधोरेखित केले.अदानी म्हणाले, जगात काही जागा अशा असतात की ज्या नकाशावर एक बिंदू नसतात ते प्रगती, परिवर्तन व अशक्य कोटीतील कार्य प्रत्यक्षात उतरविण्यासाठीची जागा म्हणून ओळखले जातात. बारामतीही त्यापैकी एक आहे. परिवर्तनाचे एक प्रतिक म्हणून बारामतीकडे पाहिले जाते. एक नेतृत्व अविश्वसनीय विकास कसा साध्य करु शकतो, याचे उदाहरण म्हणून शरद पवार यांच्या कामाकडे पाहिले जाते.बारामतीला अनेकदा भेट दिल्यानंतर मला ठामपणे म्हणावेसे वाटते की, शरद पवार यांनी येथे केलेले कार्य केवळ स्थानिक विकासापुरते मर्यादित नाही. शेतीत सुधारणा, सहकाराची उभारणी, उद्योजकतेला चालना, शैक्षणिक संस्था निर्माण, उद्योग धोरणांची मांडणी आणि हे सर्व एकात्मिक पद्धतीने करीत त्यांनी बारामतीला भारतासाठी अभ्यासातील एक दिशादर्शक पुस्तक बनवले आहे. राष्ट्रहिताचे धोरण राबविणारा नेता क्वचितच अदानी म्हणाले की, शरद पवार हे कृषीमंत्री असताना त्यांनी तयार केलेले कृषी धोरण, अन्नसुरक्षा कायदा, सहकारी संस्थांचा विकास, ग्रामीण अर्थकारणाला चालना देण्याचा प्रयत्न केला. परिवर्तन व स्थिरता असा दोन्ही गोष्टींची या देशाला जेव्हा गरज होती. तेव्हा शरद पवार हे खंबीरपणे उभे राहिले. केंद्रीय मंत्री, मुख्यमंत्री व पक्षीय स्तरावरदेखील काम करताना त्यांच्यासारखा राष्ट्रीय हिताचे धोरण राबविणारा नेता क्वचितच पाहायला मिळतो. शेतकरी जेव्हा सुखी असतो, तेव्हाच बाजारपेठ स्थिर असते हे त्यांनी दाखवून दिले आहे. अदानी हे मला मोठ्या भावाप्रमाणे खासदार सुप्रिया सुळे म्हणाल्या की, ३० वर्षांपासून पवार आणि अदानी कुटुंबाचे प्रेमाचे नाते आहे. माझ्यासाठी गौतम अदानी आणि त्यांच्या पत्नीचे मोठ्या भावाचे आणि वहिनीचे नाते आहे. चांगली – वाईट प्रत्येक गोष्ट त्यांना मी हक्काने सांगते. तेदेखील हक्काने रागावतात आणि जीव लावतात. त्यांच्या संघर्षाला आम्ही जवळून पाहिले आहे. या यशात त्यांच्या पत्नीचा मोठा वाटा असल्याचे सुळे यांनी कौतुक केले.
