Gas Shortage – गुढीपाडवा, रमजान ईद, रामनवमी, स्वामी समर्थ प्रगट दिन आणि महावीर जयंती सणांच्या पार्श्वभूमीवर पिंपरी-चिंचवड शहरात गॅस सिलिंडरच्या टंचाईचे सावट निर्माण झाले आहे. व्यावसायिक गॅस सिलिंडरचा पुरवठा कमी झाल्याने मिठाई विक्रेते व्यावसायिकांना ऐन सणासुदीच्या काळात मोठ्या अडचणींचा सामना करावा लागत आहे. परिणामी काही ठिकाणी उत्पादन कमी करावे लागत असून परिस्थिती कायम राहिल्यास व्यवसायावर मोठा परिणाम होण्याची भीती व्यक्त केली जात आहे. सध्या आंतरराष्ट्रीय स्तरावर सुरू असलेल्या संघर्षामुळे पेट्रोलियम पदार्थांच्या पुरवठ्यावर परिणाम होत असल्याचे व्यावसायिकांकडून सांगितले जात आहे. त्याचा परिणाम गॅस सिलिंडरच्या उपलब्धतेवरही दिसून येत आहे. शहरातील अनेक गॅस वितरण केंद्रांवर सिलिंडरची प्रतीक्षा वाढली आहे. व्यावसायिकांकडे उपलब्ध असलेला साठा मर्यादित असून पुढील काही दिवसांचा पुरवठाच शिल्लक असल्याचे सांगितले जात आहे. चैत्र महिन्यात गुढीपाडवा, रामनवमी आणि हनुमान जयंतीसारखे सण येत असल्याने मिठाई आणि फरसाण यांना मोठी मागणी असते. मात्र गॅस सिलिंडरचा पुरवठा अपुरा असल्याने अनेक मिठाई विक्रेत्यांना उत्पादन कमी करावे लागत आहे. गॅस टंचाईचा गुडी पाडवा सणावर परिणाम. काही ठिकाणी पर्यायी उपाय शोधण्याचा प्रयत्न सुरू असला तरी मोठ्या प्रमाणावर पदार्थ तयार करणे कठीण होत असल्याचे व्यावसायिकांनी सांगितले. गॅस वितरण केंद्रांवर सिलिंडरसाठी नागरिकांची गर्दी वाढल्याचे चित्र दिसत आहे. ऑनलाइन नोंदणी केलेल्या ग्राहकांनाच सिलिंडर उपलब्ध होत असल्याने अनेकांना प्रतीक्षा करावी लागत आहे. काही भागांत सिलिंडर मिळण्यासाठी लागणारा कालावधी वाढल्याची तक्रारही नागरिकांकडून केली जात आहे. शहरातील अनेक लहान हॉटेल व खानावळींना स्वयंपाकासाठी व्यावसायिक सिलिंडरवर अवलंबून राहावे लागते. मात्र पुरवठा कमी झाल्याने काही ठिकाणी सेवा मर्यादित ठेवावी लागत आहे. परिस्थिती अशीच राहिल्यास हॉटेल व्यवसायावर आर्थिक ताण वाढण्याची भीती व्यक्त होत आहे. महागाईच्या पार्श्वभूमीवर गॅस टंचाईचा परिणाम नागरिक आणि व्यावसायिक दोघांवरही होत असून गॅस पुरवठा सुरळीत करण्यासाठी तातडीने उपाययोजना कराव्यात, अशी मागणी शहरातील व्यापारी आणि नागरिकांकडून करण्यात येत आहे.
