BJP MLA Car Accident : उत्तर प्रदेशातील बुलंदशहरमध्ये गंगा एक्स्प्रेसवेवर भाजप आमदार चंद्रपाल सिंह लोधी यांच्या फॉर्च्युनर कारचा भीषण अपघात झाला. पोटा कबूलपूर गावाजवळ कार अनियंत्रित होऊन रस्त्याच्या कडेला असलेल्या पोलला धडकली. या अपघातात आमदार चंद्रपाल सिंह लोधी यांच्यासह दोघे जखमी झाले आहेत.

मिळालेल्या माहितीनुसार, आमदार चंद्रपाल सिंह लोधी लखनऊहून परतत होते. बीबीनगर पोलीस ठाण्याच्या हद्दीतील पोटा कबूलपूर गावाजवळ गंगा एक्स्प्रेसवेवर अचानक त्यांची फॉर्च्युनर कार अनियंत्रित झाली. त्यानंतर कार थेट रस्त्याच्या कडेला असलेल्या पोलला जाऊन धडकली. धडक इतकी जोरदार होती की, कारचे मोठे नुकसान झाले.

अपघाताची माहिती मिळताच पोलीस घटनास्थळी दाखल झाले. जखमी आमदार आणि त्यांच्यासोबत असलेल्या व्यक्तीला उपचारासाठी हापूड येथील खासगी रुग्णालयात दाखल करण्यात आले. प्राथमिक उपचारानंतर आमदार चंद्रपाल सिंह लोधी यांना पुढील उपचारासाठी दिल्लीतील एम्स रुग्णालयात हलवण्यात आले.

दरम्यान, अपघातानंतर एक्स्प्रेसवेवरील वाहतुकीवर परिणाम होऊ नये म्हणून पोलिसांनी क्रेनच्या मदतीने दुर्घटनाग्रस्त फॉर्च्युनर रस्त्यावरून हटवली. या घटनेचा तपास स्याना कोतवाली पोलीस करत आहेत.