Satara: पोलीस असल्याची बतावणी करुन रात्रीच्या वेळी रस्त्यावर बॅरेकेटिंग लावत वाहनचालकांना अडवून कारवाईची भीती दाखवत खंडणी उकळणाऱ्या सात जणांच्या टोळीचा पुसेगाव पोलिसांनी पर्दाफाश केला. या कारवाईत दोन चारचाकी वाहने, आठ मोबाइल, रोख रक्कम असा एकूण २१ लाख १९ हजार ५०० रुपयांचा मुद्देमाल जप्त करण्यात आला असून सर्व संशयितांना अटक करण्यात आली आहे. न्यायालयाने त्यांना शुक्रवारपर्यंत पोलीस कोठडी सुनावली आहे.

या कारवाईची माहिती पोलीस अधीक्षक निखिल पिंगळे यांनी सातारा येथे पत्रकार परिषदेत दिली. यावेळी अतिरिक्त पोलीस अधीक्षक डॉ. वैशाली कडूकर, कोरेगावच्या उपअधीक्षक अश्विनी शेंडगे, स्थानिक गुन्हे शाखेचे पोलीस निरीक्षक विश्‍वजित घोडके इत्यादी यावेळी उपस्थित होते. पोलीस अधीक्षक पिंगळे यांनी दिलेल्या माहितीनुसार, वर्धनगड (ता. खटाव) येथील नायरा पेट्रोल पंपाजवळ काल दि. १३ जुलै रोजी रात्री सुमारे ११.४५ वाजता काही जणांनी बॅरेकेटिंग उबे करुन ते वाहनचालकांना अडवत पैसे उकळत असल्याचीमाहिती पुसेगाव पोलिसांना मिळाली. त्यानुसार सहाय्यक पोलीस निरीक्षक नागनाथ खुणे यांनी पथकासह घटनास्थळी धाव घेतली. तेथे खाकी व खासगी पोशाखातील महिला- पुरुष वाहनांची तपासणीच्या नावाखाली अडवणूक करत असल्याचे निदर्शनास आले.

पोलिसांची चाहूल लागताच संशयितांनी पळून जाण्याचा प्रयत्न केला. मात्र, पोलिसांनी पाठलाग करून सात जणांना ताब्यात घेतले. चौकशी केली असता या व्यक्ती पोलीस खात्यात कार्यरत नसल्याचे स्पष्ट झाले. घटनास्थळी थांबविण्यात आलेल्या मोटारसायकलस्वार ऋषीकेश बाबासो शिरतोडे (रा. नागनाथवाडी) व सूरज लहुकुमार शिरतोडे (रा. ललगुण) यांनी संशयितांनी ‘आम्ही पोलीस आहोत,’ अशी बतावणी करून कारवाईची भीती दाखवत त्यांच्याकडून ५०० रुपये उकळल्याची माहिती देण्यात आली.

विकास दत्तात्रय शिंदे (रा. नागाव रस्ता, ता. वाळवा), वैभव पांडुरंग पवार, राहुल सुनील पाटील, केतन बाबासाहेब महाजन (सर्व रा. मिरज परिसर), प्रियांका रणदीप नाईक (रा. शिरोळ, जि. कोल्हापूर), प्रियांका संजय भोरे आणि अरुणा दयानंद आवळे या संशयितांना अटक करण्यात आली आहे. चौकशीदरम्यान पोलीस असल्याची बतावणी करून रात्रीच्या वेळी वाहनचालकांना अडवून खंडणी उकळल्याची कबुली या संशयितांनी दिली. कारवाईत टाटा सफारी स्टॉर्म (एमएच १२ एमएफ ३८३२), मारुती स्विफ्ट डिझायर (एमएच १० सीए ४९३७), आठ अँड्रॉईड मोबाइल, २,२०० रुपयांची रोख रक्कम असा एकूण २१ लाख १९ हजार ५०० रुपयांचा मुद्देमाल जप्त करण्यात आला.

पोलीस अधीक्षक निखिल पिंगळे, अप्पर पोलीस अधीक्षक डॉ. वैशाली कडूकर आणि उपअधीक्षक राजश्री तेरणी यांच्या मार्गदर्शनाखाली सहाय्यक पोलीस निरीक्षक नागनाथ खुणे, पोलीस हवालदार योगेश बागल, रेश्मा भोसले, अशोक सरक, कॉन्स्टेबल राहुल जाधव, उमेश देशमुख, दऱ्याबा नरळे व चालक तुषार बाबर यांच्या पथकाने ही कारवाई केली. या कामगिरीबद्दल वरिष्ठ अधिकाऱ्यांनी पथकाचे अभिनंदन केले.