FYJC First Merit List – राज्यातील इयत्ता अकरावी ऑनलाइन प्रवेश प्रक्रियेची पहिली नियमित गुणवत्ता यादी शुक्रवारी जाहीर झाली. यात राज्यभरातील ५ लाख ७४ हजार ९४५ विद्यार्थ्यांना कनिष्ठ महाविद्यालयांचे वाटप करण्यात आले आहे. संबंधित विद्यार्थ्यांना एसएमएसद्वारे आणि त्यांच्या वैयक्तिक लॉगिनवर यासंदर्भातील माहिती देण्यात आली आहे.

मिळालेल्या महाविद्यालयात प्रवेश निश्चित करण्यासाठी विद्यार्थ्यांना येत्या ३ जून २०२६ रोजी सायंकाळी ६ वाजेपर्यंत प्रत्यक्ष महाविद्यालयात हजर राहून प्रक्रिया पूर्ण करावी लागणार आहे. राज्यभरात अकरावीच्या एकूण २१ लाख ९८ हजार ६६६ जागा उपलब्ध आहेत. यंदा दहावी उत्तीर्ण झालेल्या १४ लाख २० हजार ४८६ विद्यार्थ्यांपैकी १२ लाख ५१ हजार २९४ विद्यार्थ्यांनी अकरावी प्रवेशासाठी नोंदणी केली होती.

पहिल्या फेरीत ८ लाख ८७ हजार २६४ विद्यार्थ्यांनी आपले अर्ज केले होते, त्यापैकी ५ लाख ७४ हजार ९४५ विद्यार्थ्यांना त्यांच्या पसंतीक्रम व गुणवत्तेनुसार महाविद्यालये मिळाली आहेत. उर्वरित विद्यार्थ्यांनी आयटीआय आणि इतर व्यावसायिक अभ्यासक्रमांचा मार्ग निवडला आहे.

विभागीय आणि शाखांनुसार आकडेवारी
पहिल्या फेरीत मुंबई विभागात सर्वाधिक १ लाख ३३ हजार ३२३ विद्यार्थ्यांना, तर पुणे विभागात १ लाख ९ हजार ६२२ विद्यार्थ्यांना महाविद्यालय वाटप झाले आहे. शाखांचा विचार केला असता, विज्ञान शाखेसाठी सर्वाधिक ३,२३,४३१, वाणिज्य शाखेसाठी १,२६,०९० आणि कला शाखेसाठी १,२५,४२२ विद्यार्थ्यांची निवड झाली आहे. यामध्ये राज्य मंडळाच्या ५ लाख २६ हजार १६१ आणि सीबीएसईच्या ३५ हजार ९७१ विद्यार्थ्यांचा समावेश आहे.

शिक्षण संचालकांचे आवाहन
विद्यार्थ्यांनी केवळ एसएमएसवर अवलंबून न राहता आपल्या लॉगिनमधील ‘कॅप अलॉटमेंट स्टेटस’ तपासून घ्यावे. १ ते १० पसंतीक्रमांमधील महाविद्यालय मिळाले असल्यास ३ जूनपर्यंत शुल्क भरून प्रवेश निश्चित करावा. एकदा प्रवेश निश्चित केल्यास विद्यार्थी पुढील फेऱ्यांमधून बाद होईल. ज्यांना पहिल्या फेरीत महाविद्यालय मिळालेले नाही, त्यांनी कट-ऑफचा अभ्यास करून दुसऱ्या फेरीसाठी अर्जाचा भाग-२ पुन्हा भरावा. संपूर्ण प्रक्रिया ऑनलाइन असून, कोणतेही ऑफलाइन प्रवेश ग्राह्य धरले जाणार नाहीत, असे माध्यमिक शिक्षण संचालक डॉ. महेश पालकर यांनी स्पष्ट केले आहे.