वाठार स्टेशन – वाघोली (ता. कोरेगाव) येथे जमिनीच्या वादातून जावयाने चुलत सासऱ्याला गोळ्या झाडल्याची घटना घडली असून चुलत सासरे सुनील शंकर भोईटे (वय 48) यांचा जागीच मृत्यू झाला आहे. याबाबत घटनास्थळावरून मिळालेली माहिती अशी की, मृत सुनील भोईटे यांचे बंधू नामदेव भोईटे यांना दोन विवाहित मुली आहेत. मात्र, त्यांना मुलगा नाही. नामदेव यांचा जावई रवी यादव याने नामदेव यांच्या हिश्‍श्‍याची जमीन विकली असल्याची प्राथमिक माहिती आहे. या वडिलोपार्जित जमिनीसंदर्भात न्यायालयात दावा दाखल आहे. तो दावा सुनील भोईटे यांनी दाखल केला आहे, अशीही माहिती मिळाली आहे.

यावरून रवी यादव आणि सुनील भोईटे यांच्यात वादविवाद झाले होते. आज सायंकाळी सात वाजण्याच्या सुमारास रवी यादव व सुनील यादव या दोघांनी वाघोली येथे सुनील भोईटे व त्यांचा मुलगा दुचाकीवरून घराकडे निघाले असताना त्यांना वाटेत अडवून भोईटे यांच्यावर पिस्तूल रोखले. त्यावेळी भोईटे यांचा मुलगा “माझ्या वडिलांना मारू नका’ म्हणून हात जोडून विनवण्या करीत होता. मात्र, तरीही रवी यादव याने भोईटे यांच्या पोटात व छातीत तीन गोळ्या झाडल्या. गोळ्या वर्मी लागल्याने सुनील भोईटे यांना तातडीने पिंपोडे बुद्रुकच्या ग्रामीण रुग्णालयात दाखल करण्यात आले. मात्र, तत्पूर्वीच भोईटे यांचा मृत्यू झाला.  रवी यादव व सुनील यादव यांचे मूळ गाव सोळशी (ता.कोरेगाव) असून ते सध्या पुणे येथे वास्तव्यास असतात.गोळीबाराची घटना घडल्यानंतर दोघेही स्वतःहून वाठार पोलीस ठाण्यात हजर झाले असल्याचे पोलिसांनी सांगितले. घटनेसंदर्भात वाठार पोलीस अधिक तपास करीत आहेत.