Top 10 News :  १) महाराष्ट्राच्या राजकारणात मोठी घडामोड; प्राजक्त तनपुरे भाजपमध्ये

राष्ट्रवादी काँग्रेस (शरदचंद्र पवार) पक्षाचे नेते व माजी मंत्री प्राजक्त तनपुरे यांनी मुंबईत भाजपमध्ये अधिकृत प्रवेश केलाय. भाजपचे प्रदेशाध्यक्ष रवींद्र चव्हाण यांच्या उपस्थितीत त्यांनी कमळ हाती घेतले. तनपुरे यांच्यासोबत त्यांच्या अनेक समर्थकांनीही भाजपमध्ये प्रवेश केलाय. पक्षप्रवेशानंतर त्यांनी पक्ष देईल ती जबाबदारी पूर्ण क्षमतेने पार पाडण्याचा विश्वास व्यक्त केलाय. विधान परिषद निवडणुकीच्या पार्श्वभूमीवर तनपुरे यांना भाजपकडून उमेदवारी मिळण्याचीही चर्चा आहे. राष्ट्रवादीतील युवा चेहरा मानल्या जाणाऱ्या तनपुरे यांच्या निर्णयामुळे शरद पवार गटाला मोठा धक्का बसल्याचे मानले जात आहे.

२) तुकाराम मुंढेंची धडाकेबाज कारवाई; पिंपरी दारुकांडाचे भिवंडी कनेक्शन उघड

पुणे आणि पिंपरी-चिंचवडमधील विषारी गावठी दारू प्रकरणात 22 जणांचा मृत्यू झाल्यानंतर अन्न व औषध प्रशासनाने मोठी कारवाई केली आहे. आयुक्त तुकाराम मुंढे यांच्या निर्देशानुसार भिवंडीतील ‘रेक्स इंटरनॅशनल’ कंपनीच्या गोदामावर छापा टाकून 5,929 किलो मिथेनॉलचा बेकायदेशीर साठा जप्त करण्यात आला. तपासात हेच विषारी रसायन पुण्यातील दारू भेसळीसाठी वापरण्यात आल्याचे समोर आले आहे. या प्रकरणातील पुरवठा साखळी उघड झाली असून मुख्य आरोपींसह संबंधितांवर कारवाई सुरू आहे. दरम्यान, ठाणे जिल्ह्यातही एफडीएने 7.30 लाख रुपयांचा संशयित साठा जप्त केला असून 6 आरोपींना अटक करण्यात आली आहे. 25 मे रोजी पदभार स्वीकारल्यानंतर मुंढे यांनी राज्यभर धाडसत्र सुरू करत आरोग्याशी खेळणाऱ्यांविरोधात कठोर भूमिका घेतली आहे.

३) मनोज जरांगे यांच्यावर गंभीर आरोप; अमोल खुणेंनी केली ईडी चौकशीची मागणी

मराठा आरक्षण आंदोलनाचे नेते मनोज जरांगे हे अंतरवली सराटी येथे आमरण उपोषणाला बसले असताना त्यांच्यावर गंभीर आरोप करण्यात आले आहेत. जरांगे यांना मारण्याची ‘सुपारी’ घेतल्याच्या प्रकरणातील आरोपी अमोल खुणे यांनी हे आरोप केले आहेत. सध्याचे उपोषण मराठा समाजासाठी नसून रद्द झालेली कोट्यवधी रुपयांची टेंडर पुन्हा मिळवण्यासाठी असल्याचा दावा त्यांनी केला. तसेच जरांगे आणि त्यांच्या सहकाऱ्यांच्या मालमत्तेत अचानक वाढ झाल्याचा आरोप करत ईडीमार्फत चौकशी करण्याची मागणी केली. पांडुरंग तारक, गंगाधर काळकुटे, स्वप्निल तारख आणि संजय कटारे यांच्या मालमत्तेचीही चौकशी व्हावी, अशी मागणी खुणे यांनी केली आहे. दरम्यान, या आरोपांवर मनोज जरांगे किंवा त्यांच्या सहकाऱ्यांची अधिकृत प्रतिक्रिया अद्याप समोर आलेली नाही.

४) मुंबईकरांना महागाईचा आणखी झटका; CNG आणि PNG च्या दरांमध्ये मोठी वाढ

इराण-अमेरिका संघर्षाच्या पार्श्वभूमीवर जागतिक बाजारातील अस्थिरतेचा परिणाम आता मुंबईतील इंधन दरांवरही दिसू लागला आहे. महानगर गॅस लिमिटेड (MGL) ने सीएनजी आणि पीएनजीच्या दरात वाढ जाहीर केली आहे. नव्या दरानुसार सीएनजीच्या किमतीत प्रति किलो 2 रुपयांची वाढ करण्यात आली असून मुंबईत आता सीएनजीचा दर 86 रुपये प्रति किलो झाला आहे. तसेच घरगुती पीएनजीच्या दरात प्रति एससीएम 50 पैशांची वाढ होऊन तो 52 रुपये प्रति एससीएम झाला आहे. गेल्या 15 दिवसांतील ही सीएनजी दरातील दुसरी वाढ असून 13 मेपासून आतापर्यंत सीएनजी 4 रुपयांनी महागली आहे. या दरवाढीचा सर्वाधिक फटका रिक्षा-टॅक्सी चालकांसह सर्वसामान्य नागरिकांना बसणार असून भाडेवाढीची मागणीही जोर धरू लागली आहे.

५) कर्नाटकच्या नव्या मुख्यमंत्र्यांचा शपथविधी ३ जूनला; कार्यकर्त्यांना गर्दी टाळण्याचे आवाहन

कर्नाटकच्या नव्या मुख्यमंत्र्यांचा शपथविधी सोहळा ३ जून रोजी बेंगळुरूतील लोकभवनच्या ग्लास हाऊसमध्ये पार पडणार असल्याची माहिती काँग्रेसचे प्रदेश कार्याध्यक्ष जी. सी. चंद्रशेखर यांनी दिली. सुरुवातीला हा सोहळा राजभवनात होणार असल्याची चर्चा होती, मात्र अखेर लोकभवन येथेच कार्यक्रम निश्चित करण्यात आला आहे. शपथविधी अत्यंत साधेपणाने आयोजित करण्याचा निर्णय पक्षाने घेतला असून कोणताही भपका किंवा उधळपट्टी टाळण्यात येणार आहे. इंधन संकट आणि बेंगळुरूमधील वाहतूक कोंडी लक्षात घेता राज्यभरातून मोठ्या प्रमाणात कार्यकर्त्यांना आणण्याचा प्रस्तावही रद्द करण्यात आला. त्यामुळे कार्यकर्ते आणि समर्थकांनी बेंगळुरूमध्ये गर्दी करू नये तसेच प्रशासनाला सहकार्य करावे, असे आवाहन पक्षाकडून करण्यात आले आहे.

६) वादळ-पावसाचा कहर; यूपी-बिहारमध्ये 48 जणांचा मृत्यू, अनेक भागांत अलर्ट

देशातील उष्णतेच्या लाटेदरम्यान मान्सूनपूर्व पावसाने अनेक राज्यांना झोडपून काढले असून उत्तर प्रदेश आणि बिहारमध्ये वादळ, मेघगर्जना व वीज कोसळण्याच्या घटनांमध्ये एकूण 48 जणांचा मृत्यू झाला आहे. बिहारमध्ये गेल्या 24 तासांत 17 जणांचा मृत्यू झाला असून पाटणा विमानतळावरील खराब हवामानामुळे 4 विमानांचे मार्ग बदलण्यात आले, तर 18 उड्डाणांना विलंब झाला. उत्तर प्रदेशमध्ये 31 जणांचा मृत्यू झाला असून सहारनपूरमध्ये पुराच्या पाण्यात इनोव्हा, ट्रॅक्टरसह 10 वाहने वाहून गेली. दरम्यान, राजस्थानातील 30 जिल्ह्यांमध्ये पाऊस आणि गारपिटीचा इशारा देण्यात आला आहे. पंजाबमधील पठाणकोटमध्ये गारपिटीने हजेरी लावली, तर मोहालीमध्ये मुसळधार पाऊस झाला. हवामान विभागाने 15 हून अधिक राज्यांमध्ये पावसाचा इशारा जारी केला आहे.

७) इराणचा अमेरिकेला जोरदार प्रत्युत्तरात्मक हल्ला; अनेक सैनिक जखमी

इराण आणि अमेरिका यांच्यातील तणाव पुन्हा एकदा वाढला आहे. अमेरिकेने इराणच्या अब्बास बंदर परिसरावर केलेल्या हल्ल्यानंतर इराणने प्रत्युत्तरात्मक कारवाई करत अमेरिकन लष्करी तळांना लक्ष्य केले. इराणी इस्लामिक रिव्होल्यूशनरी गार्ड कॉर्प्सने ड्रोन आणि क्षेपणास्त्रांच्या मदतीने हल्ला केल्याचा दावा केला आहे. कुवेतमधील अली अल सलेम एअर बेसवर झालेल्या हल्ल्यात काही अमेरिकन सैनिक जखमी झाल्याची माहिती समोर आली आहे. तसेच अमेरिकेचे MQ-9 रीपर ड्रोनही नुकसानग्रस्त झाल्याचे वृत्त आहे. कुवेतच्या हवाई संरक्षण यंत्रणेने बहुतांश क्षेपणास्त्रे हवेतच रोखली, मात्र काही अवशेष तळ परिसरात पडले. युद्धविरामाच्या चर्चेदरम्यान झालेल्या या हल्ल्यामुळे मध्य पूर्वेतील परिस्थिती आणखी तणावपूर्ण बनली आहे.

८) १ जूनपासून LPG नियमात मोठे बदल; ‘एक घर, एक गॅस कनेक्शन’ धोरण लागू

देशभरात १ जूनपासून एलपीजी वापराबाबत महत्त्वाचे नियम लागू होणार आहेत. केंद्र सरकारच्या ‘एक घर, एक गॅस कनेक्शन’ धोरणानुसार ज्या घरांमध्ये पीएनजी कनेक्शन उपलब्ध आहे, त्यांना एलपीजी सिलिंडर ठेवता येणार नाही. अशा ग्राहकांना एलपीजी कनेक्शन संबंधित एजन्सीकडे जमा करावे लागणार आहे. सरकारचा उद्देश घरगुती सिलिंडरचा गैरवापर, काळाबाजार आणि दुहेरी कनेक्शन रोखणे हा आहे. तेल कंपन्यांनी पीएनजी आणि एलपीजी दोन्ही वापरणाऱ्या ग्राहकांची पडताळणी सुरू केली आहे. नियमांचे पालन न केल्यास एलपीजी रिफिल बंद होण्याची शक्यता व्यक्त केली जात आहे. देशात एलपीजी ग्राहकांची संख्या ३३.५ कोटींवर पोहोचली असून पीएनजी ग्राहकांची संख्या १.६४ कोटी आहे. त्यामुळे इंधन वितरण अधिक प्रभावी करण्यासाठी सरकारने हा निर्णय घेतल्याचे सांगितले जात आहे.

९) राजा शिवाजी’ची बॉक्स ऑफिसवर दणदणीत कमाई; 29 दिवसांत 103 कोटींचा टप्पा पार

अभिनेता-दिग्दर्शक रितेश देशमुख याच्या ‘राजा शिवाजी’ चित्रपटाने बॉक्स ऑफिसवर दमदार कामगिरी कायम ठेवली आहे. महाराष्ट्र दिनानिमित्त 1 मे रोजी प्रदर्शित झालेल्या या चित्रपटाने रिलीजच्या 29 व्या दिवशी 35 लाख रुपयांची कमाई केली. Sacnilk च्या अहवालानुसार, चित्रपटाची भारतातील एकूण नेट कमाई 103.15 कोटी रुपयांवर पोहोचली आहे. सुमारे 100 कोटी रुपयांच्या बजेटमध्ये तयार झालेल्या या चित्रपटाने खर्च वसूल करत नफ्याचा टप्पाही गाठला आहे. छत्रपती शिवाजी महाराजांच्या जीवनावर आधारित या चित्रपटात रितेश देशमुख प्रमुख भूमिकेत झळकला असून महेश मांजरेकर, जेनेलिया देशमुख, अभिषेक बच्चन आणि सलमान खान यांच्याही महत्त्वाच्या भूमिका आहेत. चित्रपटाच्या ओटीटी प्रदर्शनाबाबत अद्याप अधिकृत घोषणा झालेली नसली तरी जूनअखेर किंवा जुलैमध्ये तो प्रदर्शित होण्याची चर्चा आहे.

१०) राजस्थानचा पराभव; ९६ धावा करणाऱ्या वैभव सूर्यवंशीला अश्रू अनावर!

आयपीएल २०२६ च्या ‘क्वालिफायर-२’ सामन्यात गुजरात टायटन्सकडून राजस्थान रॉयल्सचा ७ विकेट्सने पराभव झाला आणि त्यांचे फायनलचे स्वप्न भंगलं. या हृदयद्रावक पराभवानंतर राजस्थानचा १५ वर्षीय सलामीवीर वैभव सूर्यवंशी मैदानातच पूर्णपणे खचून गेला आणि त्याला अश्रू अनावर झाले. या सामन्यात वैभवने ४७ चेंडूंत ९६ धावांची झुंझार खेळी करून संघाला २१४ धावांपर्यंत पोहोचवले होते, पण दुर्दैवाने त्याची ही खेळी व्यर्थ ठरली. पराभवाचे दुःख सहन न झाल्याने वैभव डगआऊटमध्ये एकटाच बसून रडताना दिसला, तेव्हा अनुभवी रवींद्र जडेजाने त्याला जवळ घेऊन धीर दिला.