पुणे : अलिकडच्या काळात पती-पत्नीमध्ये कशावरून वाद होतील सांगू शकत नाही. चिंगुस पती किराणा भरत नाही, या कारणावरून झालेला वाद थेट न्यायालयात पोहोचला. एकामेकांच्या विरोधात तीन वेगवेगळे दावे दाखल झाले. मात्र, यशस्वी समुपदेशानामुळे दोघांचा संसार वाचला आहे. २३ वर्षाचा मुलगा आणि १६ वर्षाच्या मुलाच्या भवितव्यासाठी दोघांनी पुन्हा एकत्र येण्याचा निर्णय घेतला. ४ वर्षानंतर दोघे एकत्र आले. अन् एकमेकांविरोधात केलेले तीन दावे तडजोडीने मागे घेतले.

विश्वास आणि विनया (नावे बदलली आहेत) या दाम्पत्याच्या नात्याची ही गोष्ट. या दोघांचा विवाह २००० मध्ये झाला. विश्वास फर्निचर व्यावसायिक असून, विनया गृहिणी आहे. त्यांचा मुलगा कॉलेजमध्ये शिकतो, तर मुलगी शाळेत जाते. विश्वासची आई या दाम्पत्याच्या घरखर्चाला हातभार लावत होती. तोपर्यंत त्यांचा संसार सुरळीत सुरू होता. मात्र, तिचे निधन झाल्यानंतर दाम्पत्यामध्ये वाद वाढू लागले. पती किराणा भरत नाही, अशी तक्रार पत्नीने केली.

त्यावरून दोघांमध्ये जोरदार भांडणे झाली. रागाच्या भरात पतीने थेट विभक्त राहण्यासाठी न्यायालयात धाव घेतली; तर पत्नीने तात्पुरत्या पोटगीसाठी कौटुंबिक न्यायालयात अर्ज केला. कौटुंबिक न्यायालयाने पत्नीचा अर्ज मंजूर करत तिला व मुलीला दरमहा सात हजार रुपये अंतरिम पोटगी देण्याचा आदेश पतीला दिला. मात्र, पतीने तीन वर्षे पोटगीच दिली नाही. त्यामुळे दोन लाख अठरा हजार रुपयांची थकीत पोटगी मिळावी, यासाठी पत्नीच्या वकिलांनी न्यायालयात दाद मागितली. त्यामुळे दोघे विभक्ती, पोटगी आणि थकित पोटगी असे तीन दावे न्यायालयात लढत होते.

कौटुंबिक न्यायालयाने हे प्रकरण समुपदेशनासाठी पाठवविले. पत्नीतर्फे अ‍ॅड. भाग्यश्री गुजर-मुळे आणि पतीतर्फे अ‍ॅड. प्रियांका जहागीरदार यांनी काम पाहिले. त्यांच्यासमवेत समुपदेशक शानूर शेख यांनी पती-पत्नीचे समुपदेशन केले. त्यांनी या दाम्पत्याची समजूत घालत त्यांच्यामधील कटुता कमी केली; तसेच मुलांच्या भवितव्यासाठी एकत्र येण्याचे आवाहन केले.

त्याला सकारात्मक प्रतिसाद देत दोघांनी तडजोड करायचे ठरविले. त्यानुसार, पतीने पत्नीला घरखर्चासाठी दरमहा सात हजार रुपये, वर्षभरात थकित पोटगीचे दोन लाख रुपये आणि तिचे गहाण ठेवलेले बारा तोळे सोने देण्याची तयारी दर्शवली आणि मुलीचे संपूर्ण शिक्षण आणि लग्नाच्या खर्चाची जबाबदारी घेतली; तर पत्नीने पतीविरोधातील सर्व दावे मागे घेण्यास संमती दिली.