हडपसर (विवेकानंद काटमोरे) – शालेय परिसरांमध्ये विद्यार्थिनींना छेडछाडीच्या प्रकाराला सामोरे जावे लागू नये, चुकीचे वर्तन करणाऱ्यांवर वेळीच कारवाई व्हावी व विद्यार्थी आणि पोलिस यांच्यात सुसंवाद वाढावा यासाठी शाळांमध्ये पोलिस दीदी आणि पोलिस काका हा उपक्रम राबविण्यात येत आहे. या पार्श्वभूमीवर हडपसर पोलिस स्टेशन अंतर्गत शाळांमध्ये विद्यार्थ्यांना मार्गदर्शन करण्यात येत आहे. या संवादातून शालेय शिक्षक, विद्यार्थी, पालक आणि पोलीस यांच्यामध्ये मैत्री निर्माण होत आहे.

हडपसर पोलीस स्टेशनचे वरिष्ठ पोलिस निरीक्षक अरविंद गोकुळे यांच्या मार्गदर्शनाखाली हडपसर पोलीस स्टेशनचे सहाय्यक पोलीस उपनिरीक्षक दिनेश शिंदे तसेच दामिनी पथकाच्या दामिनी व पोलीस दीदी वैशाली उदमले यांनी विद्यार्थ्यांशी संवाद साधला. ते म्हणाले, शाळेच्या आवारात विद्यार्थिनींची छेड काढली जाते. अनेक विद्यार्थी शाळेत किंवा आवारात तंबाखू किंवा गुटखा खातात अनेकदा नशापानाचे इतर मार्गही अवलंबतात यावर पोलिसांचे लक्ष असणार आहे.

यासाठी साध्या वेशातील पोलिस शाळेत केव्हाही येणार असून चुकीच्या पद्धतीने वर्तन करणाऱ्यांवर कारवाई केली जाणार आहे. विद्यार्थ्यांनी पोलिसांना दिदी आणि काका समजून काही गैरप्रकार होत असल्यास माहिती द्यावी, असे आवाहन शिंदे व उदमले यांनी केले आहे. गेल्या तीन महिन्यांत हडपसर पोलीस ठाण्याच्या हद्दीतील सुमारे चाळीस शाळांमध्ये हा सवांद साधण्यात आला आहे. विद्यार्थ्यांशी संवाद साधल्याने अनेक मुले-मुलींकडून त्यांच्या अडचणी सांगितल्या जात आहेत. त्यावर शिक्षक, पालक यांना आवश्यक त्या सूचना व मार्गदर्शन यातून केले जाते आहे. एकूणच या उपक्रमातून शालेय परिसरातून गैरप्रकारांना आळा घालण्यात येणार असल्याचे पोलीस काका व दीदींनी सांगितले.

शिक्षक, पालक आणि विद्यार्थी यांचा सवांद व्हायला हवा –
वरिष्ठ पोलीस निरीक्षक अरविंद गोकुळे यांच्या मार्गदर्शनाखाली हा उपक्रम सुरू असून यातून सकारात्मक बदल पाहायला मिळत आहे. पालक, शिक्षक आणि विद्यार्थी यांच्यात अपेक्षित असा संवाद नसलेल्या ठिकाणी विद्यार्थी अधिक वाईट गोष्टीकडे आकर्षित होतात असे लक्षात येते आहे. पालकांनी नियमितपणे मुलांची स्वतः विचारपूस करावी, शिक्षकांनी पालकांशी संवाद साधून वेळोवेळी पालक सभा घ्याव्यात. शालेय विद्यार्थ्यांनी बाहेरील मित्र-मैत्रिणी करू नयेत. मोबाईलचा कमीत कमी वापर करता येईल का याकडे पालकांनी आवर्जून लक्ष द्यायला हवे. – दिनेश शिंदे, सहाय्यक पोलीस उपनिरीक्षक, हडपसर पोलीस स्टेशन