नेवासा: शासनाच्या घरकुल लाभार्थ्यांना घरबांधणीसाठी पाच ब्रास वाळू मोफत देण्याची घोषणा राज्य सरकाने केली.  शासनाच्या या आदेशाचे महसूल खात्याकडूनच पालन होत नसल्यामुळे गोरगरीब घरकुल लाभार्थ्यांच्या निवारा उभारणीला मोफत वाळू उपलब्ध होत नाही. यामुळे नेवासा तालुक्यातील अनेक घरकुल लाभार्थ्यांनी पदरमोड करुन चढ्या भावाने वाळू विकत घेत आहेत. त्यामुळे तालुक्यात शासनाच्या मोफत वाळूचा बोजवारा उडाल्याने महसूल विभागाचे ‘वराती मागून घोडे’ दामटण्याचा प्रकार उघडकीस आला आहे. पालकमंत्री राधाकृष्ण विखे-पाटील यांनी महसूल अधिकाऱ्यांची कान उघडणी करण्याची मागणी घरकुल लाभार्थ्यांकडून केली जात आहे.

राज्य सरकारच्या नव्या वाळू धोरणानुसार घरकुल बांधकामासाठी लाभार्थ्यांना पाच ब्रास वाळू मोफत देण्याची घोषणा करण्यात आली असून, तसा शासन आदेशही निर्गमित झालेला आहे. मात्र, पावसाळाजवळ येवून अवकाळी पाऊसानेही नेवासा तालुक्यात हजेरी लावण्यास सुरुवात केली आहे. महसूल विभागाच्या अनागोंदी कारभारामुळे घरकुल लाभार्थ्यांना शासनाची मोफत वाळू अद्यापही उपलब्ध होत नसल्यामुळे अनेक घरकुल लाभार्थ्यांनी पदरमोड करुन घरकुलाचे निम्मेअर्धे बांधकाम उरकत आणले आहे.

शासनाची मोफत वाळू धोरणाची अंमलबजावणी नेवासा पंचायत समिती आणि महसूल विभागाकडून अद्यापही झाली नसल्यामुळे शासनाच्या आदेशालाच तालुका प्रशासनाने केराची टोपली दाखवली आहे. यामुळे घरकुल लाभार्थ्यांना मोफत वाळू कधी मिळणार? असा सवाल लाभार्थ्यांतून उपस्थित केला जात आहे.

 पदरात वाळू नेमकी कधी पडणार?

घरकुल लाभार्थ्यांना घरबांधणीसाठी पाच ब्रास वाळू मोफत देण्यासंदर्भात महसूल यंत्रणेणे कासवगतीने हालचाली सुरू करून सोमवारी नेवासा तहसिल कार्यालयात एक बैठक घेतली. या बैठकीतून वाळू लिलाव आणि गट निश्चित करण्याच्याच हालचाली सुरू झालेल्या असल्या तरी घरकुल लाभार्थ्यांच्या पदरात वाळू नेमकी कधी पडणार असा प्रश्न मात्र अनुत्तरीतच राहिला आहे. 

‘वराती मागून घोडे…..

शासनाच्या नव्या धोरणानुसार घरकुल लाभार्थ्यांना पाच ब्रास वाळू मोफत देण्यासाठी महसूल विभागाकडून वाळूची व्यवस्था करण्यासाठी गट निश्चित करुन लिलाव अथवा जप्त केलेली वाळू घरकुल लाभार्थ्यांच्या पदरात पाडण्यासाठी महसूल विभागाने युद्ध पातळीवर प्रयत्न गरजेचे आहे. मात्र, महसूल यंत्रणा ढेपाळलेली असून घरकुल लाभार्थ्यांचे घरबांधणीचे काम सुरू झाले असले तरी, हा गुंता महसूल विभागाकडून कधी सोडवला जाणार असा यक्ष सवाल घरकुल लाभार्थ्यांच्या मनात घर करुन उभा आहे.