Heat Wave : संपूर्ण युरोपला तडाखा देणाऱ्या विक्रमी उष्णतेच्या लाटेमुळे फ्रान्समध्ये केवळ तीन दिवसांत सुमारे एक हजार अतिरिक्त मृत्यू झाल्याचा अंदाज व्यक्त करण्यात आला आहे. फ्रान्सच्या सार्वजनिक आरोग्य विभागाने दिलेल्या माहितीनुसार, देशातील अनेक भागांमध्ये तापमान ४० अंश सेल्सिअसच्या पुढे गेले होते, तर रात्रीचे तापमानही असामान्यरीत्या उच्च राहिल्याने मृत्यूंचे प्रमाण झपाट्याने वाढले.

बुधवार ते शुक्रवार या कालावधीत मृत्यूंच्या संख्येत मोठी वाढ झाली. बुधवारी देशात १,२०० हून अधिक मृत्यूंची नोंद झाली, तर गुरुवार आणि शुक्रवारी प्रत्येकी १,४०० हून अधिक नागरिकांचा मृत्यू झाला. याआधी एप्रिल आणि मे महिन्यांत दररोज सरासरी ९०० ते १,००० मृत्यू होत होते.

प्राथमिक आकडेवारीनुसार, उष्णतेच्या लाटेदरम्यान किमान एक हजार अतिरिक्त मृत्यू झाल्याचा अंदाज असून, अनेक मृत्यूंची नोंद अद्याप प्रक्रियेत असल्याने हा आकडा आणखी वाढू शकतो. मृतांपैकी सुमारे ८५ टक्के नागरिकांचे वय ६५ वर्षांपेक्षा अधिक असल्याचे स्पष्ट झाले आहे.

मृत्यूंचे प्रमाण वाढले –

विशेषतः पॅरिससह उष्णतेसाठी ‘रेड अलर्ट’ घोषित करण्यात आलेल्या भागांमध्ये मृत्यूंचे प्रमाण लक्षणीय वाढले. खासगी निवासस्थानी होणाऱ्या मृत्यूंमध्ये जवळपास ४० टक्क्यांनी वाढ झाल्याचे अधिकाऱ्यांनी सांगितले.

अंत्यसंस्कार सेवांवर ताण –

वाढत्या मृत्यूंमुळे पॅरिसमधील अंत्यसंस्कार सेवांवर मोठा ताण निर्माण झाला आहे. पॅरिसजवळील ऑर्ली विमानतळ परिसरात शवगृह चालविणारे झौहैर हेर्तेली यांनी सांगितले की, त्यांच्या शवगृहातील सर्व शीतगृह क्षमता भरून गेली असून, दररोज शेकडो दूरध्वनी येत आहेत.

अनेक अंत्यसंस्कार संस्थांना मृतदेह ८० किलोमीटर दूर असलेल्या शवगृहांमध्ये हलवावे लागत आहेत. परिस्थिती हाताळण्यासाठी पॅरिस प्रशासनाने तात्पुरती शीतगृहे उभारली आहेत, तर रुग्णालयांमध्येही अतिरिक्त जागा उपलब्ध करून देण्यात आली आहे.

युरोप सर्वाधिक वेगाने तापत असल्याचा इशारा –

जागतिक आरोग्य संघटनेचे महासंचालक टेड्रोस अधानोम घेब्रेयसस यांनी युरोप हा पृथ्वीवरील सर्वाधिक वेगाने तापणारा खंड असल्याचा इशारा दिला आहे. “युरोपमधील तापमान जागतिक सरासरीपेक्षा दुप्पट वेगाने वाढत आहे. सध्या १५ कोटीहून अधिक नागरिक तीव्र उष्णतेचा सामना करत असून, शेकडो जणांचा मृत्यू झाला आहे,” असे त्यांनी म्हटले आहे.

जर्मनी, पोलंडमध्येही तापमानाचे विक्रम –

उष्णतेच्या लाटेने युरोपमधील अनेक देशांमध्ये तापमानाचे नवे विक्रम प्रस्थापित केले आहेत. जर्मनीमध्ये ४१.७ अंश सेल्सिअस, पोलंडमध्ये ४०.५ अंश सेल्सिअस, तर झेक प्रजासत्ताकात ४१.९ अंश सेल्सिअस तापमानाची नोंद झाली.

दरम्यान, जर्मनीमध्ये जंगलांना लागलेल्या आगी, वाहतूक व्यवस्थेवरील परिणाम, रेल्वे आणि ट्राम सेवा विस्कळीत होणे, तसेच उत्तर युरोपमध्ये वादळे आणि विजांच्या कडकडाटाच्या घटनाही घडल्या आहेत.

तज्ज्ञांच्या मते, हवामान बदलामुळे अशा प्रकारच्या तीव्र उष्णतेच्या लाटा अधिक वारंवार आणि अधिक तीव्र होत असून, वृद्ध नागरिक, वातानुकूलन सुविधांचा अभाव आणि जुन्या इमारतींची रचना यामुळे युरोपमधील लाखो नागरिक अजूनही धोक्याच्या छायेत आहेत.