Padmaja Venugopal Resign : माजी मुख्यमंत्र्यांच्या लेकीचा भाजपला रामराम; ‘घाईत केलेली चूक’ म्हणत पुन्हा काँग्रेसमध्ये येण्याची चर्चा सुरू
Padmaja Venugopal Resign : केरळ भाजप प्रदेशाध्यक्ष राजीव चंद्रशेखर यांच्याकडे दिला राजीनामा

Padmaja Venugopal Resign: काँग्रेसचे ज्येष्ठ नेते आणि केरळचे माजी मुख्यमंत्री दिवंगत के. करुणाकरन यांच्या कन्या पद्मजा वेणुगोपाल पुन्हा एकदा घरवापसी करण्याच्या चर्चा सुरू झाली आहे. पद्मजा वेणुगोपाल यांनी भाजपाला सोडचिठ्ठी देत केरळ भाजपा प्रदेशाध्यक्ष राजीव चंद्रशेखर यांच्याकडे आपला राजीनामा दिला आहे.
भाजपात प्रवेश करण्याचा निर्णय ही ‘घाईत केलेली चूक’ होती, अशी कबुली त्यांनी दिली आहे. भाजपामध्ये प्रवेश केल्यानंतर काही काळातच पक्षाची विचारधारा आपल्या विचारांशी जुळणारी नाही, याची जाणीव आपल्याला झाली होती, असे त्यांनी पत्रकार परिषदेत सांगितले.
मार्च २०२४ मधील लोकसभा निवडणुकीपूर्वी काँग्रेसला सोडचिठ्ठी देत पद्मजा यांनी भाजपामध्ये प्रवेश केला होता. त्या भाजपाच्या राष्ट्रीय परिषदेच्या सदस्या होत्या. आपण वैयक्तिक कारणांमुळे राजीनामा देत असल्याचे नमूद करत आपला राजीनामा भाजपाचे प्रदेशाध्यक्ष राजीव चंद्रशेखर यांच्याकडे सुपूर्द केला होता. त्यानंतर त्यांनी भाजपमध्ये प्रवेश केला, मात्र आता त्यांनी भाजपमधून बाहेर पडण्याचा निर्णय घेतला आहे.
भाजपामध्ये प्रवेश करण्याचा निर्णय एका दिवसात घेण्यात आला. अत्यंत दुःखी असताना हा निर्णय घेतला. काँग्रेसने त्रिशूरमध्ये मला बाजूला सारले. माझा अपमान केला. मी माझ्या तक्रारी घेऊन अनेकांकडे गेले, पण परिस्थितीत काहीही बदल झाला नाही. म्हणूनच मी भाजपामध्ये सामील होण्याचा निर्णय घेतला. काँग्रेस पक्षाची संस्कृती अत्यंत खालावलेली होती. कोणत्याही महिलेला यशस्वी होऊ देत नाहीत. कदाचित ते महिलांना उमेदवारी देतील, पण कोणत्याही महिलेबद्दल त्यांना फारसा आदर नाही, असे पद्मजा यांनी काँग्रेस सोडताना म्हटले होते.
काँग्रेसमध्ये परतणार का?
मात्र आता काँग्रेसमध्ये परतण्याचा निर्णय घेतला का? असे विचारताच त्यावर अद्याप असा कोणताही निर्णय घेतलेला नसल्याचे त्यांनी स्पष्ट केले. “काैटुंबिक पार्श्वभूमीमुळे या पक्षाशी आपले नैसर्गिक नाते आहे, मी अजून काहीही ठरवलेले नाही. मी अद्याप परतलेली नाही, सध्या फक्त राजीनामा दिला आहे,” असे त्या म्हणाल्या.
नेमकं काय म्हणाल्या पद्मजा वेणुगोपाल ?
“भाजपाची आणि माझी विचारधारा नीट जुळत नाही. हे मला सुरुवातीपासूनच समजले होते. पण एखाद्या पक्षात गेल्यानंतर लगेचच राजीनामा देऊन बाहेर पडणे योग्य नसते. माझी त्यांच्याविरोधात एकही तक्रार नाही. त्यांनी माझ्याशी कधीही वाईट वर्तन केले नाही,” असे पद्मजा यांनी सांगितले.
भाजपामध्ये जाण्यामागची परिस्थिती स्पष्ट करताना पद्मजा म्हणाल्या की, अत्यंत दुखावल्या गेल्याने आणि मानसिक त्रासातून आपण तो निर्णय वेगात घेतला होता. कोणत्याही पदाच्या किंवा जबाबदारीच्या अपेक्षेने आपण भाजपाशी संपर्क साधला नव्हता, इतकेच नव्हे तर हा निर्णय घेताना आपल्या जवळच्या मित्रांनाही याची कल्पना दिली नव्हती, असे त्यांनी सांगितले.
दरम्यान, पंतप्रधान नरेंद्र मोदी यांनी अनेक चांगली कामे केली आहेत. त्यांनी काही चुकाही केल्या आहेत, परंतु पक्षात असताना मी त्या निदर्शनास आणू शकले नाही. सध्या या विषयावर माझे कोणतेही मत नाही, परंतु भविष्यात ते बदलू शकते. माझ्या वडिलांचे काही कार्य आहेत, जे मला पूर्ण करायचे आहेत, जेणेकरून त्यांच्या आठवणी जिवंत राहतील. आता मी कोणत्याही राजकीय पक्षाचा भाग नसल्यामुळे, मी हे काम करू शकते, असे त्यांनी स्पष्ट केले.
हेही वाचा :
Crime News : शिरुरमध्ये खळबळ…! डॉक्टरकडून पत्नीच्या खुनाचा प्रयत्न





