Katraj News : एकीकडे शहरातील वाढते प्रदूषण, घटते हरितक्षेत्र आणि वन्यजीवांच्या अधिवासाचा प्रश्न गंभीर बनला असताना, दुसरीकडे कात्रज घाटातील वनविभागाच्या मालकीच्या तब्बल तीन एकर परिसरातील जवळपास एक हजार झाडे काढण्यात येत आहे. (Katraj News)

वनविभागाकडून या कारवाईचे समर्थन करताना संबंधित झाडे विदेशी प्रजातीची असून ती काढून त्या ठिकाणी देशी झाडांची लागवड करण्यात येणार असल्याचे सांगण्यात येत आहे. मात्र, ‘जुनी झाडे तोडा आणि नवीन झाडे लावा’ या तर्कावर पर्यावरणप्रेमींनीच प्रश्नचिन्ह उपस्थित केले आहे. (Katraj News)

कात्रज घाट परिसर हा शहराच्या दृष्टीने महत्त्वाचा हरित पट्टा मानला जातो, अशा संवेदनशील भागातील झाडे मोठ्या प्रमाणावर हटविताना वनविभागाने कोणत्या निकषांचा आधार घेतला? घाटात विविध पक्षी, सरपटणारे छोटे प्राणी आणि इतर जीवसृष्टीचा वावर आहे. (Katraj News)

मोठ्या प्रमाणात झाडांची तोड झाल्याने या जीवांच्या अधिवासावर त्याचा काय परिणाम होणार, याचाही विचार झाला का? विकासाच्या नावाखाली किंवा प्रजाती बदलण्याच्या नावाखाली अधिवासच नष्ट होत असेल, तर वनविभागाच्या संवर्धनाच्या भूमिकेचा नेमका अर्थ काय? तळजाई टेकडीवर हा प्रयोग फसलेला आहे. चार वर्षांपासून याठिकाणी काम सुरु आहे. याबाबत स्पष्टता आवश्यक असल्याचे कात्रज घाट स्वच्छता अभियानाचे जनक विक्रांत सिंह यांनी म्हटले आहे. (Katraj News)

वनविभागाच्या आधीच्या चुकीच्या धोरणामुळे आज जुनी झाडे तोडण्याची वेळ आली आहे. मोकळ्या जागांवर देशी झाडे न लावता जुन्या जागेवरच पुन्हा रोपे लावणे म्हणजे वनविभागाच्या धोरणातील विरोधाभास व विसंगती स्पष्ट करते.

– अँड दिलीप जगताप, पर्यावरणप्रेमी, जनहित फाउंडेशन

आता जी झाडे आहेत ती खूप कमी पाण्यावर आणि वाईट परिस्थितीतही जगतात. म्हणून खूप पूर्वी ही झाडे मागे दुष्काळात लावण्यात आलेली आहेत. त्यांच्या सावलीत गवत येत नाही. उंदरासारखे प्राणी या झाडांमुळे मरतात. त्यामुळे आपण ही झाडे काढत आहोत. एकूण ३० हजार नवी देशी झाडे लावण्यात येणार आहेत. त्यासाठी आपल्याला निधी मिळालेला असून जेवढा निधी मिळेल तेवढीच झाडे काढून नवीन लावण्यात येतील.

-नंदकिशोर पाटील, वनपरिक्षेत्र अधिकारी हवेली विभाग