Argentina vs Egypt Fan Mohammed Shariful Islam Death In Bangladesh  : फिफा फुटबॉल विश्वचषक २०२६ मध्ये अर्जेंटिना आणि इजिप्त यांच्यातील ‘राऊंड ऑफ १६’ चा सामना कमालीचा रोमांचक आणि वादग्रस्त ठरला. अर्जेंटिनाने २-० अशा पिछाडीवरून ३-२ असा थरारक विजय मिळवून क्वार्टर फायनल गाठली. मात्र, या सामन्यानंतर बांगलादेशमधून एक धक्कादायक आणि मन सुन्न करणारी घटना समोर आली आहे. फुटबॉल सामन्यादरम्यान झालेल्या एका किरकोळ वादाने इतके हिंसक रूप घेतले की, एका ३८ वर्षीय फुटबॉल चाहत्याला आपला जीव गमवावा लागला. मोहम्मद शरीफुल इस्लाम असे मृत व्यक्तीचे नाव असून, या हत्येच्या घटनेने क्रीडा वर्तुळात तीव्र संताप व्यक्त केला जात आहे.

“तुझ्या बापालाही गोल करता आला नाही!” अन् खेळ खल्लास

मिळालेल्या माहितीनुसार, शरीफुल इस्लाम हा ब्राझीलचा कट्टर समर्थक होता आणि या सामन्यात तो इजिप्तला पाठिंबा देत होता. सामन्यात जेव्हा इजिप्तने सुरुवातीला २-० अशी भक्कम आघाडी घेतली आणि अर्जेंटिनाचा कर्णधार लिओनेल मेस्सी पेनल्टीवर गोल करण्यात अपयशी ठरला, तेव्हा शरीफुलने जवळच्या एका चहाच्या टपरीवर उपस्थित असलेल्या अर्जेंटिनाच्या चाहत्यांची खिल्ली उडवण्यास सुरुवात केली.

🚨🇧🇩 𝗧𝗥𝗔𝗚𝗜𝗖: A football fan in Bangladesh has reportedly died after being brutally beaten following an argument during the Argentina vs Egypt World Cup match.

According to reports, the victim, a Brazil supporter who was backing Egypt during the game, was allegedly attacked…

— The Touchmine | 𝐓 (@TouchmineX) July 10, 2026

त्याने चिडवताना, “तुमच्या बापालाही (मेस्सीला) गोल करता आला नाही,” असे वक्तव्य केले. या विधानामुळे दोघांमध्ये जोरदार बाचाबाची सुरू झाली, जिचे रूपांतर काही वेळातच हाणामारीत झाले. अर्जेंटिनाच्या संतप्त समर्थकांनी शरीफुलवर जीवघेणा हल्ला केला. यानंतर गंभीर जखमी झालेल्या अवस्थेत शरीफुलला रुग्णालयात नेण्यात आले. मात्र डॉक्टरांना त्याचे प्राण वाचवण्यात अपयश आले.

“फुटबॉल मॅचसाठी कोणी जीव कसा घेऊ शकतं?”

शरीफुल हा व्यवसायाने ऑटो रिक्षा चालक होता आणि त्याच्या कुटुंबातील तो एकमेव कमावता सदस्य होता. पतीच्या निधनानंतर त्याची पत्नी ब्युटी बानू हिने व्यक्त केलेले दुःख काळजाला भिडणारे आहे. ती म्हणाली, “फक्त एका फुटबॉल सामन्यासाठी कोणी कोणाचा जीव कसा घेऊ शकतं? मला दोन लहान मुली आहेत, आता त्या आपल्या वडिलांना कशा हाक मारतील? आमचे संपूर्ण कुटुंब उद्ध्वस्त झाले आहे.” ब्युटी बानूने आरोपींना कठोर शिक्षेची मागणी केली असून, आता दोन्ही मुलींच्या पालनपोषणाचा मोठा प्रश्न तिच्यासमोर उभा राहिला आहे.

हेही वाचा – France Reach Semifinal : एम्बाप्पेने मेस्सी स्टाईलने डागला गोल! मोरक्कोला धूळ चारत फ्रान्स फिफा विश्वचषकाच्या उपांत्य फेरीत दाखल

अर्जेंटिना-इजिप्त महामुकाबला ठरला वादग्रस्त –

हा सामना मैदानावरही वादाने वेढलेला होता. इजिप्तने रेफ्रींच्या अनेक निर्णयांवर प्रश्नचिन्ह उपस्थित केले होते, ज्यामुळे दोन्ही संघांचे खेळाडू आणि कोचिंग स्टाफमध्ये मोठा राडा झाला होता. अर्जेंटिनाचा संघ ७९ व्या मिनिटापर्यंत २-० ने मागे होता, परंतु त्यानंतर अवघ्या १५ मिनिटांच्या आत अर्जेंटिनाने ३ गोल डागत चमत्कारिक विजय मिळवला होता.