Flyover Accident: कात्रज-कोंढवा रोडवरील राजस सोसायटी चौकात सुरू असलेल्या कात्रज उड्डाणपुलाच्या बांधकामादरम्यान शनिवारी दुपारी एका कामगाराचा उंचावरून पडून मृत्यू झाला. या घटनेनंतर कामगारांच्या सुरक्षिततेकडे दुर्लक्ष करणारा संबंधित ठेकेदार आणि जबाबदार यंत्रणांवर कायदेशीर कारवाई करण्याची मागणी अखिल भारतीय मराठा महासंघाने केली आहे.

पोलिसांच्या माहितीनुसार, उड्डाणपुलाचे काम सुरू असताना कामगार सुमारे २० ते २५ फूट उंचीवरून खाली कोसळला. घटनेनंतर परिसरातील नागरिकांनी तत्काळ धाव घेऊन कामगाराला उपचारासाठी भारती रुग्णालयात दाखल केले. कामगार डोक्यावर न पडता पाठीवर आदळला. मात्र त्याच्या पाठीला व पायाला दुखापत झाल्याने त्याचा मृत्यू झाला. तपासादरम्यान मृताचे नाव मुकेश कुमार (३०) असल्याचे समजले

अखिल भारतीय मराठा महासंघाचे नागरी समस्या तक्रार निवारण व पर्यावरण समितीचे शहराध्यक्ष सचिन शिंदे पाटील यांनी सांगितले की, उड्डाणपुलाच्या कामाच्या ठिकाणी कामगारांच्या सुरक्षिततेसाठी आवश्यक उपाययोजना नसल्याचे वारंवार निदर्शनास आले. हेल्मेट, सेफ्टी बेल्ट, सुरक्षा जाळी आणि अन्य संरक्षक साधनांचा अभाव होता.