Flop Movies Of 2025: २०२५ हे वर्ष बॉलीवूडसाठी फारसं अनुकूल ठरलं नाही. यंदा अनेक मोठ्या स्टार्स आणि कोट्यवधींच्या बजेटमध्ये तयार झालेले चित्रपट बॉक्स ऑफिसवर अपेक्षित कामगिरी करू शकले नाहीत. प्रेक्षकांची उत्सुकता असूनही कथा, दिग्दर्शन, सेन्सॉर अडचणी आणि रिलीज डेट क्लॅश यांचा फटका या चित्रपटांना बसल्याचं पाहायला मिळालं. कंगना रणौत दिग्दर्शित आणि अभिनीत ‘इमर्जन्सी’ या चित्रपटाबाबत सुरुवातीला मोठी चर्चा होती. सेन्सॉरच्या अडचणींमुळे चित्रपट उशिरा प्रदर्शित झाला. सुमारे ५० कोटींच्या बजेटमध्ये तयार झालेल्या या चित्रपटाने भारतात केवळ १७ कोटी तर जगभरात फक्त २२.५ कोटींची कमाई केली, त्यामुळे हा चित्रपट फ्लॉप ठरला. अजय देवगणचा ‘सन ऑफ सरदार २’ हा चित्रपटही प्रेक्षकांना फारसा भावला नाही. सुमारे १०० कोटींच्या बजेटमध्ये तयार झालेल्या या चित्रपटाने भारतात ४४.९ कोटी तर जगभरात ६५.८ कोटींची कमाई केली. त्याच दिवशी प्रदर्शित झालेला ‘धडक २’ हाही चित्रपट अपयशी ठरला. ५० कोटींच्या बजेटमध्ये तयार झालेल्या या चित्रपटाने केवळ २२.५ कोटींची कमाई केली. राजकुमार रावची प्रमुख भूमिका असलेला ‘मालिक’ हा चित्रपटही बॉक्स ऑफिसवर चालू शकला नाही. ५० कोटी खर्च करून तयार करण्यात आलेल्या या सिनेमाने भारतात फक्त २३.५ कोटींची कमाई केली. मोठ्या अपेक्षा असूनही प्रेक्षकांचा प्रतिसाद मिळू शकला नाही. मोठ्या बजेटमुळे विशेष चर्चा झालेला राम चरण आणि कियारा आडवाणी यांचा ‘गेम चेंजर’ हा चित्रपट २०२५ मधील सर्वात मोठा फ्लॉप ठरला. जवळपास ४०० ते ४५० कोटींच्या बजेटमध्ये तयार झालेल्या या चित्रपटाने फक्त १३१ ते १७८ कोटींची कमाई केली. याचप्रमाणे हृतिक रोशन आणि ज्युनियर एनटीआर यांचा ‘वॉर २’ हा चित्रपटही अपेक्षांवर उतरू शकला नाही. ४०० कोटींच्या बजेटमध्ये तयार झालेल्या या चित्रपटाने भारतात केवळ २४०.५ कोटींची कमाई केली. सलमान खान आणि रश्मिका मंदाना यांचा ‘सिकंदर’ हा ईदला प्रदर्शित झालेला चित्रपटही बॉक्स ऑफिसवर आपटला. सुमारे २०० कोटींच्या बजेटमध्ये तयार झालेल्या या चित्रपटाने भारतात १०८.७ कोटी तर जगभरात १८२.७ कोटींचीच कमाई केली. याशिवाय ‘फतेह’, ‘आझाद’, ‘लव्हयापा’, काजोलचा ‘माँ’, शाहिद कपूरचा ‘देवा’ आणि ‘मेरे हसबंड की बीवी’ हे कमी बजेटचे चित्रपटही प्रेक्षकांचा प्रतिसाद मिळवू शकले नाहीत. एकूणच २०२५ मध्ये बॉलीवूडमध्ये स्टारडम आणि मोठं बजेट यशाची हमी ठरत नसल्याचं स्पष्ट झालं असून, प्रेक्षकांची बदलती आवड आणि दमदार कथा यालाच अधिक महत्त्व असल्याचं या वर्षातील फ्लॉप चित्रपटांनी दाखवून दिलं.
