Nashik Kumbh Mela:  नाशिकमध्ये सिंहस्थ कुंभमेळ्याच्या शुभारंभाला सुरूवात झाली असून आज भव्य धर्मध्वजारोहण सोहळा होणार आहे. रामकुंडावर आणि त्र्यंबकेश्वरच्या कुशावर्त तीर्थावर दुपारी १२:०२ वाजता अधिकृत ध्वजारोहण देशाच्या राष्ट्रपती द्रौपदी मुर्मू यांचा हस्ते ध्वजारोहण सोहळा पार पडणार आहे.

या ऐतिहासिक क्षणाचे साक्षीदार होण्यासाठी रामकुंड परिसर सज्ज झाला आहे. संपूर्ण परिसरात आकर्षक सजावट करण्यात आली असून, भव्य मंडप, धार्मिक प्रतीके आणि ऐतिहासिक देखाव्यांच्या माध्यमातून कुंभमेळ्याचा आध्यात्मिक वारसा अधोरेखित करण्यात आला आहे.

या सोहळ्याला मुख्यमंत्री देवेंद्र फडणवीस, दोन्ही उपमुख्यमंत्री, आठ मंत्री यांच्यासह अनेक राजकीय आणि प्रशासकीय मान्यवर उपस्थित राहणार आहेत. याशिवाय देशाच्या विविध भागांतून साधू-महंत आणि धर्मगुरूही या सोहळ्यासाठी नाशिकमध्ये दाखल झाले आहेत. आजच्या धर्मध्वजारोहण सोहळ्याकडे संपूर्ण देशाचे लक्ष लागले आहे.

सिंहस्थ कुंभमेळ्याचे नियोजन कसे असणार 

सिंहस्थ कुंभमेळ्याची अधिकृत सुरुवात ऑक्टोबर २०२६ मध्ये होत असली, तरी मुख्य धार्मिक विधी आणि गर्दीचा काळ ऑगस्ट आणि सप्टेंबर २०२७ या महिन्यांत असणार आहे. २९ जुलै २०२७: नगर प्रदक्षिणा (नाशिक शहराची पवित्र परिक्रमा).

०२ ऑगस्ट २०२७ (आषाढ सोमवती अमावस्या): पहिले अमृत स्नान, ३१ ऑगस्ट २०२७ (श्रावण अमावस्या): दुसरे व मुख्य अमृत स्नान, ११ सप्टेंबर २०२७ (भाद्रपद एकादशी): तिसरे अमृत स्नान (फक्त नाशिक येथे – वैष्णव आखाड्यांसाठी), १२ सप्टेंबर २०२७ (भाद्रपद एकादशी): तिसरे अमृत स्नान (फक्त त्र्यंबकेश्वर येथे – शैव आखाड्यांसाठी) आणि २४ जुलै २०२८: कुंभमेळ्याचा अधिकृत समारोप (ध्वजावतरण – ध्वज उतरवणे) असे या कार्यक्रमाचे आयोजन असणार आहे. Nashik Kumbh Mela

पौराणिक कथा आणि ‘कुंभ’
‘कुंभ’ या शब्दाचा अर्थ ‘घडा’ किंवा ‘कलश’ असा होतो. पौराणिक कथेनुसार, सत्ययुगात जेव्हा देव आणि दानवांनी मिळून ‘समुद्रमंथन’ केले, तेव्हा त्यातून १४ रत्ने निघाली. त्यातील सर्वात शेवटचे रत्न म्हणजेच ‘अमृत कुंभ’ (अमृताने भरलेला घडा) होते.

हे अमृत मिळवण्यासाठी देव आणि दानवांमध्ये १२ दिवस आणि १२ रात्री (जे मानवी जगातील १२ वर्षांच्या बरोबरीचे आहे) युद्ध झाले. या ओढाताढीत अमृत कुंभातून अमृताचे काही थेंब पृथ्वीवरील प्रयागराज, हरिद्वार, उज्जैन  आणि नाशिक-त्र्यंबकेश्वर या चार पवित्र ठिकाणी पडले. या पार्श्वभूमीवर दर १२ वर्षांनी या चार ठिकाणी आलटून-पालटून कुंभमेळा भरवला जातो. Nashik Kumbh Mela

हेही वाचा: 

Top15: आज सिंहस्थ कुंभमेळ्याचे ध्वजारोहण ते जनगणनेच्या तारखा जाहीर! जाणून घ्या आजच्या TOP 15 News