Sinhagad Fort Viral Video | पुण्यातील सिंहगड किल्ल्यावर न्यूझीलंडहून आलेल्या परदेशी पर्यटकासोबत काही टवाळखोर तरुणांनी असभ्य वर्तन करत त्याला मराठीतून शिव्या देण्यास भाग पाडल्याची घटना घडली होती. खरंतर ही घटना ३ एप्रिल रोजी घडली  होती. मात्र, त्या संबंधीचा व्हिडिओ नुकताच व्हायरल झाल्याने हा निंदनीय प्रकार उजेडात आला.

सोशल मीडियावर व्हायरल झालेल्या व्हिडिओत काही तरुण सिंहगडावर न्यूझीलंडहून आलेल्या परदेशी पाहुण्याशी असभ्य वर्तन करुन त्याला मराठीत शिव्या देण्यास भाग पाडल्याचे दिसते. हा व्हिडिओ सोशल मीडियावर व्हायरल झाल्यानंतर सर्वच स्तरातून टीकेची झोड उठली होती. संबंधित तरुणांवर गुन्हा दाखल करण्याची मागणी केली जात होती. अखेर हवेली पोलिसांत चार तरुणांविरुद्ध गुन्हा दाखल करण्यात आला.

यापैकी एका तरुणाने माफी मागितल्याची माहिती मिळत आहे. परदेशी पाहुण्याचा यूट्यूब चॅनेल असल्याने त्याने इथला संपूर्ण व्हडिओ पोस्ट केला. यानंतर त्यातील टवाळखोर तरुणांनी शिव्या दिल्याचा भाग प्रचंड व्हायरल झाला होता.

तरुणाने मागितली माफी 

माझ्याकडून खूप मोठी चुकी झाली आहे. मला भानच राहिलं नाही की मी गड किल्ल्यावर आहे. आणि नादामध्ये मित्रा मित्रांमध्ये घाण शिव्या दिल्या. नादामध्ये खूप मोठी चुकी झाली. प्लिज मला माफ करा असे म्हणत त्या मुलाने व्हिडिओ करुन माफी मागितली आहे.

३ एप्रिल या दिवशी न्यूझीलंडहून पुण्यातील सिंहगड किल्ल्यावर यूट्यूबर ल्युकेथ हा तरुण पाहुणा आला होता. त्यावेळी येथे छत्रपती संभाजीनगर येथील आठ ते दहा जणांचा ग्रृपही आला होता. यातीच काही टवाळखोर तरुणांनी न्यूझीलंडहून आलेल्या पाहुण्यासोबत गप्पा मारायला सुरूवात केली. यानंतर त्याला मराठीतून शिव्या देण्यास भाग पाडलं. पर्यटकाला मराठी येत नसल्याने तरुणांनी दिलेल्या शिव्या त्याने म्हटल्या. यानंतर हा व्हिडिओ सोशल मीडियावर प्रचंड व्हायरल झाला होता.