Fire in Malad।  मुंबईच्या पश्चिम उपनगरात असणाऱ्या मालाडमध्ये आज सकाळी भीषण आग लागल्याची धक्कादायक माहिती समोर आली आहे. मालाड-दिंडोशी दरम्यान असणाऱ्या खडकपाडा परिसरात असणाऱ्या फर्निचरच्या गोदामांमध्ये ही आग लागली आहे.  आगीचे नेमके कारण अद्याप समजू शकले नसले तरी एका गोदामात लागलेली ही आग आजुबाजूला पसरत गेली आणि आता या आगीने भीषण रूप धारण केले आहे.  धुराचे हे लोट दूरवर पसरले असून यावरुन या आगीची तीव्रता लक्षात येते.

अग्मिशमन दलाच्या चार ते पाच गाड्या घटनास्थळी दाखल Fire in Malad। 

आज सकाळी आग लागल्याची माहिती मिळताच अग्मिशमन दलाच्या चार ते पाच गाड्या तातडीने घटनास्थळी दाखल झाल्या आहेत. सध्या अग्निशमन दलाकडून आग विझवण्यासाठी शर्थीचे प्रयत्न सुरु आहेत. आग लागलेल्या भागात आजुबाजूला मोठ्याप्रमाणावर झोपडपट्टी आणि फर्निचरची दुकाने असल्याने ही आग आणखी पसरण्याचा धोका आहे. या पार्श्वभूमीवर सध्या दिंडोशी पोलीस घटनास्थळी दाखल झाले असून त्यांच्याकडून सुरक्षेच्या कारणास्तव आजुबाजूचा परिसर खाली केला जात आहे. या आगीत अद्याप कोणतीही जीवितहानी झाल्याचे वृत्त नाही. मात्र, या आगीत फर्निचरची गोदामं जळून खाक झाल्याने मोठ्याप्रमाणावर वित्तहानी झाल्याचा अंदाज आहे. सध्या अग्निशमन दलाच्या जवानांकडून आगीवर नियंत्रण मिळवण्यासाठी शर्थीचे प्रयत्न सुरु आहेत.

आगीच्या झळा बाजूच्या दुकानांना  Fire in Malad। 

आग वेगाने पसरु लागल्यानंतर या परिसरातील रहिवाशांची पळापळ सुरु झाली. या परिसरातील एका हॉटेलजवळ गॅस सिलिंडर असलेल्या काही गाड्या उभ्या होत्या. या गाड्या आगीच्या भक्ष्यस्थानी पडल्यास स्फोटांची मालिका सुरु होऊ शकते. त्यासाठी पोलिसांकडून सिलेंडरच्या या गाड्या हटवण्यासाठी धावपळ सुरु आहे. या भागात रांगेत फर्निचरची अनेक दुकाने आहेत. आगीने भीषण स्वरुप धारण केल्यानंतर या दुकानांना आगीची झळ जाणवू लागली. आगीच्या धगीने अनेक दुकानांमधील काचा तडकायला सुरुवात झाली आहे. त्यामुळे येथील व्यावसायिकांनी आपल्या दुकानांमधील साहित्य इतर ठिकाणी हलवायला सुरुवात केली आहे. सध्या खडकपाडा परिसरातील नागरिकांमध्ये घबराट पसरली आहे. याठिकाणी रस्त्यावर नागरिकांची गर्दी जमली आहे.