FIR Filed Against Shah Rukh Khan & Deepika Padukone: बॉलीवूडचे सुपरस्टार शाहरुख खान आणि अभिनेत्री दीपिका पादुकोण यांच्यावर फसवणुकीच्या प्रकरणात एफआयआर दाखल करण्यात आला आहे. हे दोघेही लोकप्रिय सेलिब्रिटी असून त्यांचा मोठा चाहतावर्ग आहे. पण आता त्यांच्या नावावर गुन्हा नोंदवल्याने खळबळ माजली आहे.

तक्रार नेमकी कशामुळे?

‘एका वृत्तानुसार, राजस्थानमधील भरतपूर येथील रहिवासी कीर्ती सिंग यांनी ही तक्रार केली आहे. त्यांनी २०२२ साली ह्युंदाई कंपनीची कार २३.९७ लाख रुपयांना खरेदी केली होती. मात्र, काही महिन्यांतच त्या गाडीत गंभीर तांत्रिक बिघाड दिसून आला.

कंपनीकडे तक्रार केल्यावर त्यांना गाडीचं मॉडेलच खराब असल्याचं सांगण्यात आलं. त्यामुळे समस्या सोडवली नाही. अखेर कीर्ती सिंग यांनी न्यायालय आणि नंतर मधुरा गेट पोलिस ठाण्यात धाव घेतली. त्यानंतर पोलिसांनी शाहरुख, दीपिका आणि ह्युंदाईशी संबंधित इतर सहा जणांविरोधात गुन्हा दाखल केला आहे.

शाहरुख खान १९९८ पासून ह्युंदाई कंपनीसोबत जोडले गेले आहेत. तर दीपिका पादुकोण २०२३ साली ब्रँड अॅम्बेसॅडर बनली. २०२४ मध्ये या दोघांनी एकत्रितपणे ह्युंदाईची जाहिरात केली होती.

सर्वोच्च न्यायालयाने स्पष्ट केलं आहे की, चुकीच्या जाहिरातीमुळे जर ग्राहकांची फसवणूक होत असेल तर त्यात कंपनीसोबत जाहिरात करणारे सेलिब्रिटीदेखील तितकेच जबाबदार ठरतील.

या प्रकरणी पोलिस तपास सुरू आहे. मात्र, शाहरुख खान किंवा दीपिका पादुकोण यांनी अद्याप कोणतीही अधिकृत प्रतिक्रिया दिलेली नाही.