FIFA World Cup Instagram Post On Kolhapur Football Culture : सध्या जगभरात फिफा फुटबॉल विश्वचषक २०२६ चा (फिव्हर शिगेला पोहोचला असताना, महाराष्ट्रातील फुटबॉलची पंढरी समजल्या जाणाऱ्या कोल्हापूरची थेट आंतरराष्ट्रीय पातळीवर चर्चा रंगली आहे. जगातील सर्वात मोठी क्रीडा संघटना असलेल्या ‘फिफा विश्वचषक’च्या अधिकृत इन्स्टाग्राम खात्यावरून अस्सल कोल्हापुरी शैलीतील खास मराठी पोस्ट शेअर करण्यात आल्या आहेत. या अभूतपूर्व कौतुकामुळे कोल्हापूरच्या फुटबॉल संस्कृतीची दखल आता जागतिक स्तरावर घेतली गेल्याची भावना क्रीडाप्रेमींमधून व्यक्त होत आहे.

फिफाच्या पोस्टमध्ये “लय भारी” आणि “विषय हार्ड!”

फिफाने आपल्या अधिकृत सोशल मीडिया हँडलवर ख्रिस्तियानो रोनाल्डो, लिओनेल मेस्सी आणि नेमार यांसारख्या महातारकांच्या फोटोंसह काही इमेजेस पोस्ट केल्या आहेत. विशेष म्हणजे, या पोस्टवर “लय भारी”, “विषय हार्ड”, “रोनाल्डोचा विषय लय हार्ड हाय” अशा अस्सल कोल्हापुरी शब्दांचा वापर करण्यात आला आहे. ही ‘कोल्हापुरी स्टाईल’ सोशल मीडियावर प्रचंड व्हायरल झाली असून, नेटकऱ्यांनी “कोल्हापूर जगात भारी” अशा कमेंट्स करत या पोस्टला लाखो लाईक्स दिले आहेत.

‘क्रिकेटवेड्या देशात फुटबॉलवेडे शहर’!

भारत जरी क्रिकेटप्रेमी देश म्हणून ओळखला जात असला, तरी कोल्हापूरसाठी फुटबॉल हा केवळ एक खेळ नसून ती एक जिवंत संस्कृती आणि श्वास आहे. राजर्षी छत्रपती शाहू महाराजांच्या संस्थानकाळापासून कोल्हापुरात फुटबॉलला राजाश्रय मिळाला. येथील स्थानिक क्लब्स, पावसाळ्यातील चिखलातील सामने आणि रात्रीच्या प्रकाशझोतातील स्पर्धा पाहण्यासाठी हजारो प्रेक्षक गर्दी करतात.

हेही वाचा – Trump FIFA Trophy : फिफा विश्वचषक २०२६ च्या फायनलमध्ये मोठा ट्विस्ट! विजेत्या संघाला ‘या’ व्यक्तीच्या हस्ते मिळणार ट्रॉफी

विश्वचषकाच्या निमित्ताने कोल्हापूरच्या रस्त्यांवर मेस्सी आणि रोनाल्डोचे प्रचंड मोठे कटआऊट्सही उभारण्यात आले आहेत. कोल्हापूरच्या या अनोख्या फुटबॉल वेडाला आता फिफाने दिलेली ही सलामी ऐतिहासिक ठरली आहे.