FIA : ‘फेडरेशन ऑफ इंडियन असोसिएशन्स’ने (FIA) १६ ऑगस्टच्या संध्याकाळी सिप्रियानी वॉल स्ट्रीट येथे ‘भारत बियॉन्ड बॉर्डर्स 2.0’ गाला या भव्य सोहळ्याचे आयोजन करून ४४ व्या ‘इंडिया डे’ उत्सवाची सांगता केली. या कार्यक्रमाला प्रशासकीय अधिकारी, लोकप्रतिनिधी, सेलिब्रिटी, प्रायोजक आणि भारतीय-अमेरिकी समाजातील प्रमुख व्यक्ती उपस्थित होत्या.

भारताचा ८०वा स्वातंत्र्यदिन आणि अमेरिकेच्या २५०व्या वर्धापनदिनानिमित्त हा सोहळा आयोजित करण्यात आला होता. कार्यक्रमाची सुरुवात सूत्रसंचालकांच्या स्वागतपर भाषणाने आणि संस्थापक प्रायोजकांचा औपचारिक सत्कार करून झाली. यामध्ये भारताचे महावाणिज्य दूतावास, बन्सल फाउंडेशन आणि स्टेट बँक ऑफ इंडिया यांचा समावेश होता.

‘हेरिटेज आर्ट्स अकादमी’च्या कलाकारांनी भारतीय राग किरवाणीचे वाद्यसंगीत सादर केले. त्यानंतर अमेरिका आणि भारताच्या राष्ट्रगीतांसह वाद्यसंगीताची सुरेल मैफल सादर करण्यात आली. न्यूयॉर्कच्या गव्हर्नर कॅथी होकुल, भारताचे महावाणिज्यदूत आणि उपमहावाणिज्यदूत, खासदार हर्षवर्धन, न्यूयॉर्क सिटीचे पब्लिक ॲडव्होकेट जुमाने विल्यम्स आणि हरियाणाचे मुख्यमंत्री नायब सिंह सैनी यांचे अधिकृत व्हिडिओ संदेश यावेळी सादर करण्यात आले.

या भव्य सोहळ्यात ‘एफआयए’चे चेअरमन अंकुर वैद्य आणि प्रेसिडेंट श्रीकांत अक्कापल्ली यांनी उपस्थितांना संबोधित केले. तसेच इस्रायलचे महावाणिज्यदूत गौरव वशिष्ठ आणि ‘हार्ड रॉक’च्या प्रतिनिधींनीही आपले मनोगत व्यक्त केले.

कार्यक्रमात ब्रॉडवे शैलीतील सांस्कृतिक कार्यक्रम, प्रिती पटेल यांचे ‘गोकुल धाम अनप्लग्ड’ या संगीत कार्यक्रमाचे सादरीकरण, युवा संगीत कलाकारांच्या समूहाचे सादरीकरण, मारियाची बँड आणि सर्वोत्कृष्ट वेशभूषा स्पर्धेचा समावेश होता. अभिनेत्री पूजा हेगडे यांनी विशेष चर्चासत्रात सहभाग घेतला.

तसेच अदिवी शेष, अविनाश तिवारी आणि ‘तारक मेहता का उल्टा चश्मा’च्या टीमसह सेलिब्रिटी आणि प्रसिद्ध व्यक्तींनी या सोहळ्यात आपली उपस्थिती नोंदवली. सर्व पाहुणे कलाकार आणि विशेष उपस्थितांचा ‘एफआयए’च्या नेतृत्वाकडून औपचारिक सत्कार करण्यात आला. न्यूयॉर्क सिटीच्या महापौर कार्यालयातील दिलीप चौहान यांनी सादर केलेल्या अधिकृत गौरवपत्राने कार्यक्रमाची सांगता झाली. यावेळी रोहित कोरट आणि मनन यांनी भाषणे केली, तर सृष्टी कौल नरुला यांनी आभार प्रदर्शन केले.