India Beat Pakistan : “अभिनंदन! अनेक दशकांचे वर्चस्व टिकवून ठेवले…”, भारताने पाकिस्तानचा पराभव केल्यानंतर अमित शाहांकडून कौतुक
India Beat Pakistan : भारताने पाकिस्तानचा पराभव केल्यानंतर केंद्रीय गृहमंत्री अमित शहा यांनी कौतुक केले आहे.
India Beat Pakistan 5-3 FIH Hockey World Cup 2026 Home Minister Amit Shah Wishes : एफआयएच पुरुष हॉकी विश्वचषक २०२६ (FIH Men’s Hockey World Cup 2026) च्या आपल्या अखेरच्या साखळी सामन्यात भारतीय हॉकी संघाने पारंपरिक प्रतिस्पर्धी पाकिस्तानचा ५-३ असा पराभव करत पुढच्या फेरीत दिमाखात प्रवेश केला आहे. या दारुण पराभवासह चार वेळच्या विश्वविजेत्या पाकिस्तानचे विश्वचषकातील आव्हान संपुष्टात आले आहे. गेल्या १० वर्षांत पाकिस्तानला भारताविरुद्ध एकही विजय मिळवता आलेला नाही, ही परंपरा टीम इंडियाने आजही कायम राखली. यानंतर केंद्रीय गृहमंत्री अमित शहा यांनी टीम इंडियाचे कौतुक केले.
गृहमंत्री अमित शहा यांच्याकडून टीम इंडियाचे कौतुक!
पाकिस्तानवरील या दणदणीत विजयानंतर केंद्रीय गृहमंत्री अमित शहा (Amit Shah) यांनी सोशल मीडिया प्लॅटफॉर्म ‘एक्स’वर (X) पोस्ट करत भारतीय संघाचे अभिनंदन केले. “हॉकी विश्वचषकात पाकिस्तानला पराभूत केल्याबद्दल टीम इंडियाचे मनःपूर्वक अभिनंदन! उत्कृष्ट ताळमेळ आणि कौशल्याच्या जोरावर तुम्ही भारताचा दशकांपासून चालत आलेला दबदबा कायम राखला आहे. आगामी सामन्यांसाठी माझ्याकडून खूप खूप शुभेच्छा,” अशा शब्दांत गृहमंत्र्यांनी संघाचे मनोबल वाढवले.
Congratulations to Team India for defeating Pakistan in today’s match at the Hockey World Cup 2026.
With spectacular command of the game and thrilling sporting skills, you have upheld India’s decade-long dominance.
My best wishes for the matches to come.#INDvsPAK pic.twitter.com/auW180MIeg— Amit Shah (@AmitShah) August 19, 2026
तणावानंतर मैदानात दिसली क्रीडाभावना; खेळाडूंनी केले हस्तांदोलन!
पहलगाम दहशतवादी हल्ला आणि ‘ऑपरेशन सिंदूर’नंतर दोन्ही देशांमधील तणावामुळे खेळाडू हस्तांदोलन करणे टाळत होते. मात्र, या सामन्यात सकारात्मक चित्र पाहायला मिळाले. सामन्यापूर्वी दोन्ही संघांच्या खेळाडूंनी एकमेकांना ‘हाय-फाइव्ह’ दिले आणि सामना संपल्यानंतर एकमेकांशी हस्तांदोलन (Shake Hands) करत मैत्रीपूर्ण भावनेचे दर्शन घडवले. यापूर्वी २३ जून २०२६ रोजी लंडनमध्ये झालेल्या लढतीतही खेळाडूंनी एकमेकांना हाय-फाइव्ह दिले होते.
हरमनप्रीत-अभिषेकची गोलची आतषबाजी; पाकिस्तान गारद!
ॲमस्टेलवीन येथील वॅगनर हॉकी स्टेडियमवर झालेल्या या लढतीत भारताकडून कर्णधार हरमनप्रीत सिंग (५ वे व २१ वे मिनिट) आणि अभिषेकने (११ वे व २४ वे मिनिट) प्रत्येकी २-२ गोल नोंदवले, तर हार्दिक सिंगने १ गोल केला. पाकिस्तानकडून हनान शाहिदने दोन आणि सुफियान खानने एक गोल करून संघर्ष केला; मात्र अखेर भारताने ५-३ ने सामना जिंकून पाकिस्तानला स्पर्धेतून बाहेरचा रस्ता दाखवला.
