कर्नाटक : कर्नाटकातील कलबुर्गी जिल्ह्यात एक मोठा अपघात झाला आहे. एका व्हॅनने रस्त्याच्या कडेला उभ्या असलेल्या ट्रकला जोरदार धडक दिली आहे. या भीषण अपघातात ५ जणांचा मृत्यू झाला असून १० जण जखमी झाले आहेत. हा अपघात कर्नाटकातील कलबुर्गी जिल्ह्यातील नेलोगी क्रॉसजवळ शनिवारी पहाटे ३.३० वाजण्याच्या सुमारास घडला आहे.

पोलिसांनी दिलेल्या माहितीनुसार, मृतांमध्ये सर्वजण बागलकोट जिल्ह्यातील रहिवासी असल्याची प्राथमिक माहिती मिळत आहे. अपघातात जखमी झालेल्यांना तातडीने कलबुर्गी येथील रुग्णालयात उपचारासाठी दाखल करण्यात आले आहे. घटनेची माहिती मिळताच कलबुर्गीचे पोलीस अधीक्षक ए. श्रीनिवासुलु यांनी अपघातस्थळी भेट देऊन पाहणी केली. दरम्यान, या प्रकरणी नेलोगी पोलीस ठाण्यात गुन्हा दाखल करण्यात आला आहे. मृतांमध्ये एका १३ वर्षांच्या मुलाचाही समावेश आहे.

असा झाला अपघात

सर्व लोक कलबुर्गी जिल्ह्यातील एका दर्ग्यात जात होते. पोलिसांनी सांगितले की ट्रकचा टायर पंक्चर झाला होता. तो रस्त्याच्या डाव्या बाजूला उभा होता. ड्रायव्हर टायर बदलण्यात व्यस्त होता. त्यानंतर प्रवाशांना दर्ग्याकडे घेऊन जाणाऱ्या व्हॅनने मागून ट्रकला जोरात धडक दिली. कलबुर्गीचे पोलिस अधीक्षक ए श्रीनिवासुलु म्हणाले की, अपघात इतका भीषण होता की ५ जणांचा जागीच मृत्यू झाला आहे. तर दहा झाले आहेत. अपघातानंतर व्हॅन चालक घटनास्थळावरून पळून गेला.

मंड्यामध्ये एकाच कुटुंबातील चार जणांचा मृत्यू

दुसरीकडे, मांड्या जिल्ह्यात झालेल्या एका दुर्दैवी अपघातात एकाच कुटुंबातील चार जणांना आपला जीव गमवावा लागला. हा अपघात बेंगळुरू-म्हैसूर एक्सप्रेसवेवर झाला. मिळालेल्या माहितीनुसार, कुटुंब पिरियापटनाला जात होते. त्यानंतर तुबिनाकेरे एक्झिटजवळ, राज्य परिवहन बसने मागून कारला धडक दिली. मंड्याचे एसपी मल्लिकार्जुन बालदंडी म्हणाले की, एका व्यक्तीचा जागीच मृत्यू झाला. जखमी झालेल्या तीन जणांना रुग्णालयात दाखल करण्यात आले. मात्र, डॉक्टरांनी त्याला तपासून मृत घोषित केले.