सोलापूर : सोलापूर शहराजवळील सिद्धेश्वर सहकारी साखर कारखान्याच्या समोर गुरुवारी दुपारी स्वाभिमानी शेतकरी संघटनेने आंदोलन केले. ऊस गाळप हंगाम सुरू होऊन एक महिना उलटला तरीही एकही सहकारी साखर कारखान्याने ऊस दर जाहीर केलेला नाही. या कारणावरुन शेतकऱ्यांनी आक्रमक पवित्रा घेतला आहे. सोलापूर जिल्ह्यात सुमारे 38 साखर कारखाने असूनही शेतकऱ्यांना आपले हक्क मिळत नसल्याची तक्रार ऊस उत्पादक शेतकऱ्यांनी केली आहे. उसाची पहिली उचल ३,४०० रुपये जाहीर करावी, अशी मागणी करत स्वाभिमानी संघटनेच्या नेत्यांनी शेतकऱ्यांना सोबत घेऊन कारखान्याच्या गेटवर आंदोलन केले. स्वाभिमानी शेतकरी संघटनेचे जिल्हाध्यक्ष विजय रणदिवे म्हणाले की, सोलापूरच्या मतदारसंघातील खासदार प्रणिती शिंदे यांनी केंद्रीय संसदेत एक शब्दही ऊस उत्पादक शेतकऱ्यांसाठी उचलला नाही. ही खूप मोठी शोकांतिका असल्याचे त्यांनी स्पष्ट केले. विधानसभेतही सोलापूर जिल्ह्यातील अनेक आमदारांनी शेतकऱ्यांसाठी कोणताही लक्षवेधी प्रश्न उपस्थित केला नाही. यावेळी शेतकरी संघटनेच्या नेत्यांनी आरोप केला की, आमदार असो किंवा खासदार असो, त्यांना शेतकऱ्यांशी काही देणे-घेणे नाही. त्यांचे फक्त साखर कारखान्यांच्या पोषणावर लक्ष केंद्रित आहे, अशी टीका विजय रणदिवे आणि मोहसीन पटेल यांनी केली. स्वाभिमानी शेतकरी संघटनेचे नेते विजय रणदिवे म्हणाले की, ऊस कायदा १९६६ नुसार ऊस गाळप झाल्यानंतर १४ दिवसांत बिल जमा करणे बंधनकारक आहे. परंतु सध्या ऊस गाळप हंगाम सुरू होऊन एक महिन्यापेक्षा अधिक वेळ उलटला असूनही ऊसदर जाहीर केलेला नाही. शेतकऱ्यांना पहिली उचल ३,४०० रुपये देण्यात यावी, अशी मागणी करत संघटनेने आंदोलन केले आहे.
