बुलढाणा – आपल्या शेतातील आग बाजूच्या ऊसाच्या फडाला लागू नये म्हणून आग विझवण्याचा प्रयत्न करणाऱ्या शेतकऱ्याचा आगीत गुदमरून मृत्यू झाला आहे. ही घटना मलकापूर तालुक्यातील घिर्णी गावात घडली. शेतकरी सुखदेव वाघमारे असे दुर्घटनेत मृत्यू पावलेल्या शेतकऱ्याचे नाव आहे.

वाघमारे यांनी आपल्या शेतातील गव्हाचा भुसा पेटवला. पण दुपारच्या सुमारास ही आग वाढत जाऊन शेजारील ऊसाच्या शेतापर्यंत गेली. सुखदेव वाघमारे यांनी जीवाची पर्वा न करता ऊसाच्या शेताला आग लागू नये म्हणून आग विझवण्यासाठी शर्थीचे प्रयत्न केले. परंतु आगीत गुदमरुन सुखदेव यांचा दुर्दैवी मृत्यू झाला. यावेळी मात्र ऊसाच्या शेतीला आगीपासून त्यांनी वाचवले. सुखदेव वाघमारे हे निवृत्त उपकोषागार अधिकारी होते. पोलिसांनी घटनास्थळी भेट देऊन मृतदेह उत्तरीय तपासणीसाठी पाठवला आहे. या घटनेने परिसरात हळहळ व्यक्त होत आहे.