जांबुत : कायद्याचे रक्षण करण्याची जबाबदारी असलेल्या एका आडदांड पोलीस उपनिरीक्षकाने टाकळी हाजी आऊट पोस्टमध्ये एका शेतकऱ्याला गंभीर मारहाण केल्याचा आरोप झाल्याने शिरूर पोलीस ठाण्यांतर्गत टाकळी हाजी पोलीस चौकी पुन्हा चर्चेत आली आहे. गुन्ह्याचा तपास नसतानाही चौकशीसाठी बेकायदा चौकीत बोलावून कानाखाली मारणे, शिवीगाळ करणे, मोबाईल हिसकावून घेणे आणि जीवे मारण्याची धमकी दिल्याचा आरोप ३४ वर्षीय शेतकऱ्याने केला आहे. या प्रकरणाची वरिष्ठ पोलीस अधिकाऱ्यांमार्फत निष्पक्ष चौकशी करून संबंधितांवर कारवाई करावी, अशी मागणी उपविभागीय पोलीस अधिकाऱ्यांकडे लेखी तक्रारीद्वारे करण्यात आली आहे.

रावसाहेब सुखदेव घोडे (रा. टाकळी हाजी) असे तक्रारदाराचे नाव आहे. त्यांच्या तक्रारीनुसार, ३१ ऑक्टोबर रोजी शेतीच्या वादातून चुलतभावाच्या कुटुंबीयांशी वाद झाला होता. याप्रकरणी दोन्ही बाजूंनी पोलीस चौकीत तक्रारी दिल्या होत्या. मात्र, मध्यस्थीने हा वाद मिटविण्यात आला होता. त्यानंतर ५ नोव्हेंबर रोजी पोलीस उपनिरीक्षक गोविंद कटिंग यांच्या सूचनेनुसार पोलीस हवालदार वायाळ यांनी फोन करून घोडे यांना चौकशीसाठी चौकीत बोलावले.

चौकीत गेल्यानंतर पोलीस उपनिरीक्षक गोविंद खटिंग यांनी त्यांना दमदाटी सुरू केली. संबंधित अधिकारी गणवेशात नव्हते तसेच त्यांनी सुरुवातीला स्वतःची ओळखही स्पष्ट केली नाही, असा दावा तक्रारीत करण्यात आला आहे. चौकशीदरम्यान डाव्या कानाखाली मारहाण करून मोबाईल हिसकावून घेतला, शिवीगाळ केली आणि जीवे मारण्याची धमकी दिली, असे घोडे यांनी म्हटले आहे. या प्रकारामुळे डाव्या कानाने कमी ऐकू येत असून जबड्याला सूज व वेदना होत असल्याचेही त्यांनी तक्रारीत नमूद केले आहे.

घटनेवेळी त्यांचे मेहुणे अमित मेचे उपस्थित होते. तसेच पोलीस उपनिरीक्षक राहुल भागवत हेही घटनास्थळी असल्याचे तक्रारीत म्हटले आहे. घोडे यांचे कुटुंबीय चौकीत आल्यानंतर त्यांच्याशीही अपमानास्पद वर्तन करण्यात आल्याचा आरोप करण्यात आला आहे. चौकीतील सीसीटीव्ही फुटेज, स्टेशन डायरी, तक्रार नोंदवही, वैद्यकीय अहवाल आणि प्रत्यक्षदर्शींचे जबाब तपासल्यास वस्तुस्थिती स्पष्ट होऊ शकते, असे तक्रारदाराचे म्हणणे आहे. तसेच तक्रारीनंतर स्वतःला व कुटुंबीयांना कोणताही दबाव किंवा त्रास होऊ नये, यासाठी संरक्षण देण्याची विनंतीही करण्यात आली आहे.

यापूर्वी याच पोलीस उपनिरीक्षकाने जांबुत येथाल एका गंभीर मारहाणीच्या गुन्ह्यामध्ये आरोपींकडून मोठी आर्थिक तडजोड करून आरोपींना अटकपुर्व जामीनासाठी मदत केली आहे व त्या गुन्ह्यात एका निरपराधाला जाणीवपूर्वक अडकवण्याचा प्रयत्न त्यांनी केला आहे.

चौकशीची मागणी

संबंधित पोलीस उपनिरीक्षकाची घटनेपूर्वीच चार दिवस आधी शिरूरच्या डीबी पथकात बदली झाल्याची माहिती तक्रारदाराने दिली आहे. त्यामुळे बदली आदेश, कार्यमुक्तीची तारीख, पदभार हस्तांतरण तसेच तपास पोलीस हवालदार वायाळ यांच्याकडे असताना ५ नोव्हेंबर रोजी खटिंग यांना चौकशी करण्याचा अधिकार होता का, याचीही तपासणी करण्याची मागणी करण्यात आली आहे.

तपास सुरु असल्याची माहिती

शेतकऱ्याला मारहाण केल्याप्रकरणी शिरूर पोलीस ठाण्याचे पोलीस निरीक्षक विनोद पाटील यांच्याशी संपर्क साधून विचारणा केली असता, या प्रकरणाचा तपास सुरू आहे, अशी संक्षिप्त प्रतिक्रिया त्यांनी दिली.