Akshay Athare : प्रत्येकाचं स्वतःचं एक हक्काचं घर असावं, हे स्वप्न असतं. हे स्वप्न पूर्ण करण्यासाठी अनेक जण आयुष्यभर मेहनत घेतात. संघर्ष, अडचणी आणि अनेक चढ-उतारांचा सामना केल्यानंतर जेव्हा स्वप्नपूर्ती होते, तेव्हा आनंदाला पारावार उरत नाही. सोशल मीडिया इन्फ्लुएन्सर आणि अभिनेता अक्षय आठरेच्या आयुष्यातही असाच आनंदाचा क्षण आला आहे. मात्र, या आनंदाच्या क्षणी दिवंगत बहिणीची आठवण आल्याने तो भावुक झाला.  (Akshay Athare)

अक्षय आठरेने नुकतंच स्वतःचं हक्काचं आलिशान घर खरेदी केलं आहे. या नव्या घराचा नुकताच गृहप्रवेश सोहळा पार पडला. गृहप्रवेशाच्या पूजेचे फोटो आणि व्हिडीओ अक्षयने आपल्या इन्स्टाग्राम अकाउंटवर शेअर केले आहेत. यासोबत त्याने लिहिलेली पोस्ट सध्या सोशल मीडियावर चर्चेत आहे.  (Akshay Athare)

 

View this post on Instagram

 

A post shared by Akshay Athare (@akshayathare)

अक्षयच्या बहिणीचं साधारण वर्षभरापूर्वी निधन झालं होतं. बहिणीच्या निधनानंतरही तिच्या आठवणी अक्षयच्या मनात कायम आहेत. आपल्या हक्काचं घर घेण्याचं स्वप्न पूर्ण झाल्यानंतर त्याला बहिणीची प्रकर्षाने आठवण झाली. ‘हे स्वप्न पूर्ण होताना पाहण्यासाठी आज दिदी या जगात नाही, ही गोष्ट स्वीकारणं आजही तितकंच कठीण आहे,’ अशा भावना त्याने आपल्या पोस्टमधून व्यक्त केल्या आहेत.

पत्र्याच्या घरापासून आलिशान घरापर्यंतचा प्रवास  (Akshay Athare)

अक्षयने आपल्या पोस्टमधून त्याच्या संघर्षमय प्रवासालाही उजाळा दिला आहे. पत्र्याच्या घरापासून सुरू झालेला प्रवास आज एका सुंदर आणि आलिशान घरापर्यंत पोहोचल्याचं त्याने सांगितलं.

‘कधी खिशात काहीच नव्हतं, पण डोळ्यांत स्वप्नं खूप मोठी होती. शून्यापासून सुरुवात केली. एक-एक पाऊल टाकत पुढे आलो. पडताना उठलो, थांबावंसं वाटलं तरी चालत राहिलो. पण हे स्वप्न फक्त माझं नव्हतं… हे स्वप्न माझ्या दिदीचं, माझ्या आई-बाबांचं आणि माझं होतं,’ अशा शब्दांत अक्षयने आपल्या भावना व्यक्त केल्या.

‘आपलं स्वतःचं एक सुंदर घर असावं, जिथे आपण सगळे एकत्र आनंदाने राहावं, हे स्वप्न आम्ही सगळ्यांनी मिळून पाहिलं होतं. आज ते स्वप्न हळूहळू पूर्ण होतंय. पण या आनंदाच्या क्षणी मनात एक खूप मोठी पोकळी आहे. दिदी, तू हे स्वप्न पूर्ण होताना बघायला आज या जगात नाहीस, ही गोष्ट स्वीकारणं आजही तितकंच कठीण आहे,’ असं अक्षयने पोस्टमध्ये म्हटलं आहे.

कोण आहे अक्षय आठरे?

सोशल मीडिया इन्फ्लुएन्सर आणि अभिनेता म्हणून अक्षय आठरेने स्वतःची वेगळी ओळख निर्माण केली आहे. इन्स्टाग्रामवर शेअर केलेल्या व्हिडीओंमुळे तो अल्पावधीतच लोकप्रिय झाला. सुरुवातीला नोकरी किंवा व्यवसाय करण्याचा विचार करणाऱ्या अक्षयला सोशल मीडियावरील व्हिडीओंनी अनपेक्षित प्रसिद्धी मिळवून दिली. आज इन्स्टाग्रामवर त्याचा मोठा चाहतावर्ग आहे. त्याच्या संघर्षमय आणि प्रेरणादायी प्रवासामुळे अनेक तरुण त्याच्याकडे आदर्श म्हणून पाहतात. अभिनय क्षेत्रातही त्याने काम केलं असून ‘माझ्या भाऊराया’, ‘साज तुझा’, ‘फितूर’, ‘जीव नादावला’ यांसारख्या म्युझिक अल्बममध्ये तो झळकला आहे.

Raj Thackeray : 72 वर्षांत प्रथमच राष्ट्रीय चित्रपट पुरस्कार दिल्लीबाहेर; गुजरातला सोहळा हलवल्याने राज ठाकरे संतापले