शिरूर : शिरूर – रामलिंग ग्रुप ग्रामीण ग्रामपंचायतीतील सदस्यपदाच्या अडीच वर्षांच्या कार्यकाळावरून सुरू झालेल्या वादाचा अखेर हिंसक उद्रेक झाला. शिरूर ग्रामीणमधील पाषाण मळा येथे घावटे कुटुंबातील दोन गट आमनेसामने आल्याने तुफान राडा झाला. या हाणामारीत लोखंडी रॉड, कोयता आणि लाकडी दांडक्याने मारहाण केल्याचे एकमेकांवर आरोप करण्यात आले आहेत. एवढेच नव्हे, तर चारचाकी वाहनाची तोडफोड आणि ट्रॅक्टरच्या साहाय्याने वाहनाचे नुकसान केल्याचेही आरोप समोर आले आहेत. या घटनेनंतर दोन्ही बाजूंनी शिरूर पोलीस ठाण्यात परस्परविरोधी फिर्यादी दिल्याने परिसरात खळबळ उडाली आहे.

शिरूर पोलिसांनी दिलेल्या माहितीनुसार, ग्रामपंचायतीच्या उपसरपंचपदाचा आणि सदस्यपदाचा अडीच वर्षांचा कार्यकाळ पूर्ण झाल्यानंतर ठरल्याप्रमाणे सदस्यपद देण्यावरून वाद निर्माण झाला होता. याच वादातून १० नोव्हेंबर रोजी रात्री सुमारे पावणेदहाच्या सुमारास पाषाण मळा परिसरात दोन्ही बाजूंमध्ये वादावादी होऊन मारहाणीची घटना घडली.

सीमा सोमनाथ घावटे (वय ४०) यांनी दिलेल्या फिर्यादीनुसार, सचिन भाऊसाहेब घावटे, प्रथमेश धनंजय घावटे आणि ऋषिकेश शेलार यांनी घरात प्रवेश करून त्यांच्या पतीला घराबाहेर ओढत लाथाबुक्क्यांनी मारहाण केली. तसेच सीमा घावटे आणि नितीन घावटे यांना लोखंडी रॉडने मारहाण करून जखमी केल्याचा आरोप आहे. प्रथमेश घावटे याने कोयत्याने मुलावर हल्ला करण्याचा प्रयत्न केला; मात्र नवनाथ घावटे यांनी त्याचा हात पकडल्याने अनर्थ टळल्याचे फिर्यादीत म्हटले आहे. यावेळी शिवीगाळ करून जीवे मारण्याची धमकी दिल्याचाही आरोप करण्यात आला आहे.

या फिर्यादीवरून सचिन भाऊसाहेब घावटे, प्रथमेश धनंजय घावटे आणि ऋषिकेश शेलार यांच्याविरुद्ध गुन्हा रजिस्टर क्रमांक १०२६/२०२६ नुसार गुन्हा दाखल करण्यात आला आहे.

दरम्यान, प्रथमेश धनंजय घावटे (वय २३) यांनीही स्वतंत्र फिर्याद दिली आहे. त्यांच्या तक्रारीनुसार, सोमनाथ सुभाष घावटे, नितीन सुभाष घावटे, विलास गोधाजी घावटे, प्रथमेश सोमनाथ घावटे, सार्थक सोमनाथ घावटे, सीमा सोमनाथ घावटे, शंकर शिंदे आणि आदी पेंढाकर (पूर्ण नाव माहीत नाही) यांच्याविरोधात तक्रार दाखल करण्यात आली आहेत.

संबंधितांनी एकत्र येऊन शिवीगाळ व मारहाण केली. लोखंडी रॉड, लाकडी दांडका आणि कोयत्याचा वापर करून मारहाण केल्याचे तसेच जीवे मारण्याची धमकी दिल्याचे फिर्यादीत नमूद आहे. याशिवाय मोटारकारची काच आणि टायर फोडून नुकसान केल्याचा आरोप करण्यात आला आहे. ११ नोव्हेंबर रोजी पहाटे अडीचच्या सुमारास ट्रॅक्टरच्या साहाय्याने वाहनाचे नुकसान केल्याचेही तक्रारीत म्हटले आहे.

या फिर्यादीवरून शिरूर पोलीस ठाण्यात गुन्हा रजिस्टर क्रमांक १०२७/२०२६ नुसार भारतीय न्याय संहितेच्या विविध कलमांन्वये गुन्हा दाखल करण्यात आला आहे.

ग्रामपंचायतीचे पद की प्रतिष्ठेची लढाई?.

ग्रामपंचायतीतील सदस्यपदाच्या वाटपावरून सुरू झालेला वाद आता थेट पोलीस ठाण्यापर्यंत पोहोचला आहे. राजकीय पदाच्या वादातून एकाच कुटुंबातील व्यक्तींनी एकमेकांविरोधात गंभीर हाणामारी करणे ही बाब चर्चेचा विषय ठरत आहे.

दोन्ही बाजूंच्या तक्रारींमधील आरोपांची सत्यता तपासानंतरच स्पष्ट होणार असली, तरी या घटनेमुळे ग्रामपंचायतीच्या राजकारणातील अंतर्गत संघर्ष चव्हाट्यावर आला आहे. दोन्ही गुन्ह्यांचा तपास शिरूर पोलीस करीत असून, नेमका वाद कशामुळे आणि कोणत्या कारणाने विकोपाला गेला, याकडे आता परिसराचे लक्ष लागले आहे.