Chhatrapati Sambhaji Nagar : कौटुंबिक वादाच्या ‘अँगल’ने खवड्या डोंगर प्रकरणाला नाट्यमय वळण; ‘ती’ तिसरी व्यक्ती कोण? आईच्या व्हिडिओने खळबळ
Chhatrapati Sambhaji Nagar : आता कुणाल चांदगुडेची आई संगीता चांदगुडे यांचे सोशल मीडिया अकाउंट समोर आले आहे.
Chhatrapati Sambhaji Nagar : छत्रपती संभाजीनगरमधील तिसगावच्या खवड्या डोंगरावरावरुन खाली कोसळून एकाच कुटुंबातील तीन व्यक्तींचा दुर्देवी मृत्यू झाला. या हृदयद्रावक घटनेने महाराष्ट्र हादरला आहे. आत्महत्या करण्याच्या प्रयत्नात असलेल्या मुलाला वाचण्यासाठी गेलेल्या वडिलांचा तोल गेला आणि दोघे डोंगरावरुन खाली कोसळले.
आपल्या डोळ्यादेखत मुलगा आणि पती खाली कोसळल्याचे पाहून आईनेही डोंगरावरुन खाली उडी मारली. या दुर्देवी घटनेत अख्यं चांदगुडे कुटुंब संपलं आहे. या प्रकरणाला आता वेगळे वळण लागले असून कौटुंबिक वादाचा अँगल समोर आला आहे.
पोलीस उपायुक्त रत्नाकर नवले यांची प्रतिक्रिया
ज्यावेळी ही दुर्देवी घटना घडली त्यावेळी आयफोन खरेदी तसेच त्याचे हप्ते यावरुन १९ वर्षीय कुणाल चांदगुडे यांनी आत्महत्यासारखे टोकाचे पाऊल उचलल्याचे समोर आले. या घटनेचा तपास सध्या पोलिसांकडून सुरू असून, या प्रकरणी पोलीस उपायुक्त रत्नाकर नवले यांनी प्रतिक्रिया दिली. ते म्हणाले “या तरुणाने हे टोकाचं पाऊल उचलण्यामागे फक्त आयफोन हेच कारण होतं की आणखी काही कारण होतं, हे आपण आताच सांगू शकत नाहीत. आणखी काही कारणं असू शकतात. तपासात पुढील बाबी समोर येतील.”त्यामुळे या प्रकरणात आणखी खुलासे समोर येण्याची शक्यता व्यक्त केली जात आहे.
Khavdya Dongar
संगीता चांदगुडे यांचे सोशल मीडिया अकाऊंट
आता कुणाल चांदगुडेची आई संगीता चांदगुडे यांचे सोशल मीडिया अकाउंट समोर आले आहे. संगीता चांदगुडे यांनी त्यांच्या सोशल मीडिया अकाउंटवर काही व्हिडिओ प्रसिद्ध केले होते. या व्हिडिओंमध्ये त्यांनी पती मुरलीधर चांदगुडे यांच्यासोबतच्या कौटुंबिक वादाबाबत आणि घरातील परिस्थितीबाबत भाष्य केल्याचे दिसून येत आहे. सोशल मीडियावर त्यांचे व्हिडिओ व्हायरल होत आहेत.
आपल्याला आणि पतीला त्रास झाल्याचा दावा
संगीता चांदगुडे यांनी केलेल्या दाव्यानुसार, त्यांच्या आणि मुरलीधर चांदगुडे यांच्या संसारात एका नातेवाईक महिलेच्या हस्तक्षेपामुळे वाद निर्माण होत असल्याचा आरोप त्यांनी केला होता. काही वर्षांपूर्वी त्यांच्या मोठ्या मुलाचे निधन झाल्यानंतर चांदगुडे कुटुंब मोठ्या दुःखातून जात होते. याच काळात काही नातेवाईकांकडून आपल्याला आणि पतीला त्रास झाल्याचा दावा संगीता चांदगुडे यांनी केला होता.
ती तिसरी व्यक्ती कोण?
त्यामुळे संगीता चांदगुडे यांनी उल्लेख केलेली तिसरी व्यक्ती कोण आहे, याची चर्चाही सध्या सोशल मीडियावर रंगली आहे. दरम्यान, या सोशल मीडिया व्हिडिओमधील दावे आणि खवड्या डोंगरावरील घटनेचा नेमका संबंध काय, याचा तपास पोलिसांकडून होणे महत्त्वाचे आहे. सध्या या घटनेचा तपास पोलिसांकडून सुरू असून तपासाअंती नेमक्या कोणत्या गोष्टी समोर येतात हे पाहणे महत्वाचे असणार आहे.
Chakan MIDC: चाकण परिसराची कचराकोंडी फुटणार? ३६.५ एकरांवर होणार घनकचरा प्रकल्प
