छत्रपती संभाजीनगर : गणेशोत्सव 2025 च्या पार्श्वभूमीवर राज्य सरकारने कर्णकर्कश डीजे सिस्टमवर बंदी घातली आहे. या निर्णयाच्या पाठिशी उभे राहत सामाजिक न्यायमंत्री आणि छत्रपती संभाजीनगरचे पालकमंत्री संजय शिरसाट यांनी गणेश मंडळांना डीजेऐवजी पारंपरिक बँड आणि बँजो वापरण्याचं आवाहन केलं आहे. एका कार्यक्रमात मिश्कील शैलीत बोलताना त्यांनी सांगितलं, “चाळीसगावचा बँड मागवा, वैजापूरचा बँजो मागवा. पैसे कमी पडले तर माझी बॅग उघडीच आहे!” या वक्तव्यावर उपस्थितांमध्ये हशा पिकला. काही दिवसांपूर्वी शिरसाट यांच्या खोलीत पैशांनी भरलेली बॅग दिसल्याचा व्हिडीओ व्हायरल झाला होता, त्याचा उल्लेख करत त्यांनी हे मिश्कील भाष्य केलं. शिरसाट यांनी गणेश मंडळांना डीजेचा आग्रह धरणाऱ्यांना अप्रत्यक्षपणे कानपिचक्या दिल्या. “काही गणेश मंडळांचे अध्यक्ष मला शहाणपणा शिकवतात की, आम्ही डीजेवाल्याला 10 हजार रुपये दिले आहेत. ते गेले तरी चालतील, पण एखाद्या मुलाचे कान गेले, एखाद्याला हार्ट अॅटॅक आला, तर त्याचा संसार उद्ध्वस्त होईल,” असं त्यांनी ठणकावून सांगितलं. डीजेमुळे होणाऱ्या ध्वनिप्रदूषणामुळे आरोग्याला धोका निर्माण होऊ शकतो, याकडे त्यांनी लक्ष वेधलं. त्यांनी गणेश मंडळांना पारंपरिक वाद्यांवर भर देऊन उत्सवात चांगला संदेश देण्याचं आवाहन केलं. लोक मला करोडपती समजत असतील, तर माझ्या बापाचं काय जातं? व्हायरल व्हिडीओबाबत बोलताना शिरसाट म्हणाले, “लोक मला करोडपती समजत असतील, तर माझ्या बापाचं काय जातं? व्हिडीओ वगैरे चालत राहतात, त्याची मी चिंता करत नाही. शहर चांगल्या मार्गाने पुढे जात असेल, तर त्यासाठी मदत करणं माझं कर्तव्य आहे.” त्यांनी गणेशोत्सवात ध्वनिप्रदूषण टाळून पारंपरिक संगीताला प्राधान्य देण्याचं आवाहन केलं. “आपण उत्सवातून समाजाला चांगला संदेश दिला पाहिजे,” असं सांगत त्यांनी मंडळांना बँड आणि बँजोचा पर्याय स्वीकारण्याची विनंती केली. गणेशोत्सवात सतर्कतेची गरज हवामान विभागाने कोकण आणि मध्य महाराष्ट्रात 25 ते 28 ऑगस्ट दरम्यान मुसळधार पावसाचा इशारा दिला आहे. छत्रपती संभाजीनगरातही हलक्या ते मध्यम पावसाची शक्यता आहे. या पार्श्वभूमीवर, शिरसाट यांनी गणेश मंडळांना उत्सव साजरा करताना सतर्क राहण्याचं आणि ध्वनिप्रदूषण टाळण्याचं आवाहन केलं आहे. “बाप्पाच्या स्वागतासाठी उत्साह असावा, पण आरोग्य आणि पर्यावरणाची काळजी घेणं तितकंच महत्त्वाचं आहे,” असं त्यांनी नमूद केलं.
