Extortion Case – परवानाधारक स्पा सेंटरमध्ये बेकायदेशीरपणे घुसून, महिला कर्मचाऱ्यांचे व्हिडिओ चित्रीकरण करत ५० हजार रुपयांची खंडणी मागणाऱ्या एका हायप्रोफाइल टोळीचा रावेत पोलिसांनी पर्दाफाश केला आहे. प्रसिद्धीच्या झोतात असलेल्या एका कथित माहिती अधिकार कार्यकर्ता, सामाजिक कार्यकर्तीसह चौघांवर गुन्‍हा दाखल केला आहे. आरटीआय कार्यकर्ता विष्णू सुरवसे, एक कथित महिला सामाजिक कार्यकर्ता आणि त्यांचे दोन अनोळखी साथीदारांविरुद्ध रावेत पोलीस ठाण्यात खंडणी प्रकरणी गुन्ह्यांची नोंद करण्यात आली आहे.

याबाबत एका स्‍पा चालकाने रावेत पोलीस ठाण्‍यात फिर्याद दिली आहे. फिर्यादी यांचे रावेत येथील मस्के वस्तीत अधिकृत स्पा सेंटर आहे. २३ मे २०२६ रोजी रात्री १०:३० च्या सुमारास सामाजिक कार्यकर्ती तिचे तीन साथीदारांनी स्पामध्ये जबरदस्तीने प्रवेश केला. “तुमच्या स्पामध्ये वेश्याव्यवसाय चालतो” असा खोटा आरोप करत, कोणतीही परवानगी न घेता तिथल्या महिला कर्मचाऱ्यांचे व्हिडिओ बनवण्यास सुरुवात केली.

व्हिडिओ सोशल मीडियावर व्हायरल करण्याची आणि धंदा बंद पाडण्याची धमकी देत या टोळीने ५० हजार रुपयांची थेट मागणी केली. भीतीपोटी फिर्यादीने तात्काळ ५ हजार रुपये रोख दिले. उर्वरित ४५ हजार रुपयांसाठी विष्णू सुरवसे याने फोनवरून व आरोपींनी प्रत्यक्ष भेटून सातत्याने धमक्या दिल्या. धक्कादायक बाब म्हणजे, स्पामध्ये आलेल्या एका ग्राहकालाही या टोळीने ब्लॅकमेल करून ५ हजार रुपयांची मागणी केली व ५०० रुपये ऑनलाइन उकळले!