पुणे : अनंत चतुर्दशीच्या पार्श्वभूमीवर राज्यभरात गणरायाला निरोप देण्यासाठी उत्साहाचे वातावरण निर्माण झाले आहे. पुण्यातही लाडक्या बाप्पाच्या विसर्जनासाठी भाविकांची मोठी गर्दी होऊ लागली असून, मानाच्या पाच गणपतींच्या विसर्जन मिरवणुकीला लवकरच सुरुवात होणार आहे. शहरात सध्या भक्ती आणि उत्साहाचे वातावरण पाहायला मिळत आहे.

या पार्श्वभूमीवर सोशल मीडिया इन्फ्लुएन्सर संतोष पंडित यांनी पुण्यातील गणेशोत्सवाबाबत आपले मत व्यक्त केले. पुण्यातील गणेशोत्सवाच्या परंपरेवर भाष्य करताना त्यांनी लोकमान्य टिळकांनी सार्वजनिक गणेशोत्सव सुरू करण्यामागील उद्देश सांगितला. समाजातील नागरिकांनी एकत्र यावे, या हेतूने लोकमान्य टिळकांनी गणेशोत्सवाला सार्वजनिक स्वरूप दिले. आपण लोकमान्य टिळकांच्या शाळेत शिक्षण घेतल्याचेही संतोष पंडित यांनी सांगितले.

ढोल-ताशे आणि स्पीकरच्या आवाजावर संतोष पंडित काय म्हणाले?

गणेशोत्सवातील ढोल-ताशे आणि स्पीकरच्या आवाजाच्या मुद्द्यावर बोलताना संतोष पंडित यांनी या दोन्ही गोष्टी वेगळ्या असल्याचे म्हटले. पुण्यातील कार्यकर्ते वर्षभर कामानिमित्त वेगवेगळ्या ठिकाणी व्यस्त असतात. मात्र, गणेशोत्सवाच्या महिनाभर आधीपासून ते एकत्र येतात आणि उत्सवाच्या शेवटच्या दिवशी आनंद व्यक्त करतात, असे त्यांनी सांगितले.

ढोल-ताशे वाजवा किंवा स्पीकरचा वापर करा, मात्र आवाजाची पातळी किती असावी याचाही विचार केला पाहिजे, असे मत त्यांनी व्यक्त केले.

देखाव्यांना भाविकांची गर्दी

गेल्या दहा दिवसांपासून पुण्यात भक्तीमय आणि चैतन्यमय वातावरण अनुभवायला मिळाले. विविध सार्वजनिक गणेश मंडळांनी आकर्षक आणि चित्तवेधक देखावे सादर केले होते. हे देखावे पाहण्यासाठी पुण्यासह राज्यातील विविध भागांतून भाविक शहरात दाखल झाले होते.

आता अनंत चतुर्दशीच्या दिवशी गणरायाला निरोप देण्याची वेळ आली आहे. त्यामुळे भाविकांच्या मनात उत्साहासोबतच बाप्पाला निरोप देण्याची हुरहूरही आहे. शहरात ‘गणपती बाप्पा मोरया, पुढच्या वर्षी लवकर या’चा जयघोष घुमू लागला आहे. विसर्जन मिरवणुकीच्या पार्श्वभूमीवर शहरातील प्रमुख रस्त्यांवर पोलिसांचा बंदोबस्त तैनात करण्यात आला आहे.