वॉशिंग्टन – अमेरिकेतल्या जनतेवर अवास्तव करांचा बोजा असल्याचे एका सर्वेक्षणातून समोर आले आहे. अध्यक्ष ट्रम्प यांनी निवडणुकीच्या प्रचाराच्यावेळी दिलेल्या आश्वासनानुसार गेल्या वर्षी करविषयक कायदा आणला होता. त्यातून जनतेला करांच्या ओझ्यातून थोडा दिलासा मिळाला असला, तरी करांचे ओझे अजूनही खूप जास्त आहे. असे एका सर्वेक्षणात आढळून आले आहे. अमेरिकेत महागाईत वाढ आणि मंद आर्थिक वाढ होत आहे. त्यामुळे मार्च महिन्याच्या अखेरीस झालेल्या या सर्वेक्षणात अमेरिकेतल्या नागरिकांवर वैयक्तिक मिळकतीसाठी काटकसर करावी लागत असल्याचे दिसून आले. करांच्या ओझ्यामुळे लोकांमधील नैराश्याची भावना शिगेला पोचली आहे. श्रीमंत आणि कॉर्पोरेट क्षेत्रातील लोक आपला योग्य कर भरतच नाहीत. तर इतर जण सरकारी उधळपट्टीबद्दल चिंता व्यक्त करतात, अशी एक सार्वत्रिक भावना वाढीला लागली आहे. ट्रम्प प्रशासनाने गेल्या वर्षी कर आणि खर्चातील कपातीबाबतचा एक कायदा मंजूर केला. या कायद्यानुसार बालकांसाठीची कर सवलत बळकट करण्याबरोबर टिप आणि ओव्हरटाईमवर आकारल्या जाणाऱ्या करातून सवलत दिली गेली आहे. कर विषयक विविध सवलतींमुळे लोकांचे उत्पन्न वाढू लागेल, असा अंदाज व्यक्त केला गेला होता. पण याचा सर्वाधिक फायदा अमेरिकेतल्या अतिश्रीमंतांनाच होईल, असा अंदाज कॉंग्रेसच्या बजेट ऑफिसने वर्तवला आहे. सर्वेक्षणातील १० पैकी ७ लोकांनी कर खूप जास्त असल्याचे म्हटले आहे. गेल्या वर्षीच्या तुलनेत हे प्रमाण जास्तच असल्याचे मत अनेकांनी नोंदवले. अमेरिकेतील सुमारे १० पैकी ६ प्रौढांच्या मते, त्यांना भरावा लागणारा केंद्रीय आयकर खूप जास्त आहे. २०२३ पासून ही भावना सातत्याने वाढते आहे. १९८० ते १९९० च्या दशकातल्या सर्वेक्षणात जेवढा असंतोष आढळला होता, त्या पातळीच्या जवळपास ही असंतोषाची भावना पोहोचली आहे. अनेकांना असे वाटते की अतिश्रीमंत किंवा कॉर्पोरेट लोक कर भरतच नाहीत. तर त्या सर्वेक्षणातल्या १० पैकी ४ जणांना ते स्वतः भरत असलेली कराची रक्कम त्यांना खूप त्रासदायक वाटते. पुन्हा अध्यक्ष झालेल्या ट्रम्प यांच्या करविषयक दृष्टिकोनाबद्दल प्रचंड नाराजी दिसते आहे. सर्वेक्षणातील ६४ टक्के लोकांनी ट्रम्प कर ज्या प्रकारे हाताळत आहेत, याबद्दल नाराजी व्यक्त केली. हे प्रमाण गेल्या वर्षी ५३ टक्के होते. ते आता वाढले आहे. डेमोक्रॅटबरोबर आता रिपब्लिकन देखील नाराज आहेत. सामान्यांच्या जीवनमानाला ट्रम्प यांनी धोक्यात आणल्याचे बहुतेकांचे मत आहे. जवळपास १० पैकी ९ डेमोक्रॅट्स आणि १० पैकी ६ अपक्ष लोकांच्या मते, ट्रम्प यांनी महागाईवर नकारात्मक परिणाम केला आहे. तर ४३ टक्के म्हणजेच निम्म्याहून कमी लोकांनी ट्रम्प यांनी महागाई कमी करण्यास मदत केली असे म्हटले आहे. हे बहुतेक जण रिपब्लिकन आहेत. तर ट्रम्प यांच्यामुळे काही फरक पडला नाही असे ३३ टक्के लोकांनी म्हटले आहे. ट्रम्प त्यांच्यामुळे मदत झाली असे केवळ २३ टक्के लोकांनी म्हटले आहे.
