Aditya Thackeray  – रेल्वेने दादरचे ८० वर्षे जुने हनुमानाचे मंदिर पाडण्यासाठी नोटीस बजावली. यावरुन उद्धव ठाकरे यांनी भाजपवर टीकास्त्र डागले. एक है तो सेफ है म्हणतात, पण मंदिरही सेफ नाहीत, अशी टीका त्यांनी केली होती. तर हिंदू मत मिळवण्यासाठी हा केविलवाणा प्रयत्न उद्धव ठाकरे करत असल्याचे भाजपने प्रत्युत्तर दिले. यानंतर आज सायंकाळी येथील मंदिरात आदित्‍य ठाकरे यांच्‍या उपस्थितीत महाआरती करण्यात आली. या मुद्द्यावरून राजकारण तापले आहे.

दादर पूर्वेकडील हनुमान मंदिरावरील कारवाईला आता स्थगिती देण्यात आली. रेल्वे प्रशासनाकडून तसे आदेश काढण्यात आले आहेत. परंतु, या मंदिरावरील कारवाईला केवळ स्थगिती नको तर कारवाईचा हा आदेशच रद्द करण्यात यावा, अशी मागणी ठाकरे पक्षाकडून करण्यात आली आहे.

या हनुमान मंदिरात दर्शनाकरिता शनिवारी सकाळपासूनच भाजपच्या नेतेमंडळींनी हजेरी लावली. सकाळी भाजप नेते मंगलप्रभात लोढा हे मंदिरात दर्शनासाठी पोहोचले होते, त्यांनी यावेळी आरती सुद्धा केली.यानंतर किरीट सोमय्या यांनी दुपारी 4 वाजताच्या सुमारास हनुमानाचे दर्शन घेतले.

यावेळी हनुमान मंदिराबाहेर ठाकरे पक्षाचे आणि भाजप कार्यकर्ते आमनेसामने आल्याचे पाहायला मिळाले. यामुळे काही वेळासाठी दादर रेल्वे स्थानकाबाहेर ठाकरेंचे शिवसैनिक आक्रमक झाल्याचे पाहायला मिळाले. तसेच, यावेळी त्यांनी सोमय्यांच्या विरोधात जोरदार घोषणाबाजी सुरू केली. परंतु ही परिस्थिती नियंत्रणात ठेवण्याकरिता पोलिसांना हस्तक्षेप करावा लागला.