EPFO: लाखो कर्मचाऱ्यांसाठी एक महत्त्वाची आणि आनंदाची बातमी आहे. कर्मचारी भविष्य निधी संघटनेने (EPFO) जुन्या व निष्क्रिय खात्यांमध्ये पडून राहिलेले पैसे थेट संबंधित व्यक्तींच्या बँक खात्यात जमा करण्याचा निर्णय घेतला आहे. PTI च्या वृत्तानुसार, ७ लाखांहून अधिक खात्यांमध्ये प्रत्येकी एक हजार रुपये किंवा त्यापेक्षा कमी रक्कम शिल्लक असून या सर्व खात्यांमध्ये मिळून एकूण ३०.५२ कोटी रुपये जमा आहेत. ही सर्व रक्कम आता संबंधित सदस्यांना किंवा त्यांच्या वारसांना परत केली जाणार आहे. निष्क्रिय खाते म्हणजे काय? EPF खात्यात ३६ महिन्यांपेक्षा जास्त काळ कर्मचारी किंवा कंपनी यांच्याकडून कोणतीही रक्कम जमा झाली नाही तर ते खाते निष्क्रिय मानले जाते. नोकरी बदललेले, निवृत्त झालेले किंवा जुने खाते विसरलेले असे बहुतांश लोक याला बळी पडतात. सध्या देशभरात ३१.८६ लाख निष्क्रिय EPF खाती असून त्यांमध्ये एकूण १०,९०३ कोटी रुपये जमा आहेत. सध्या हे अभियान छोट्या रकमेच्या खात्यांपासून सुरू करण्यात येत आहे. पैसे कसे परत मिळणार? ही प्रक्रिया अत्यंत सोपी आणि आपोआप होणारी असेल. ज्यांचे EPF खाते आधारशी जोडलेले आहे आणि बँक खातेही लिंक आहे, त्यांच्या खात्यात पैसे थेट जमा होतील. कोणताही अर्ज भरण्याची किंवा कागदपत्रे जमा करण्याची गरज नाही. खातेधारकाचे निधन झाले असल्यास नोंदणीकृत नामनिर्देशित व्यक्तीला किंवा कायदेशीर वारसाला ही रक्कम मिळेल. हेही वाचा – वैद्यकीय भत्ता 1 हजारांवरून 20 हजार रुपये होणार? जाणून घ्या कर्मचाऱ्यांच्या 8 प्रमुख मागण्या EPFO 3.0 — डिजिटल क्रांती येणार श्रम मंत्रालय सर्व निष्क्रिय खाती टप्प्याटप्प्याने निकाली काढण्याच्या योजनेवर काम करत आहे. याशिवाय EPFO ‘EPFO 3.0’ नावाचा मोठा डिजिटल प्रकल्पही राबवत आहे. यामध्ये कोअर बँकिंग सिस्टमसारख्या सुविधा येणार असून कागदी काम कमी होईल आणि एकाच व्यासपीठावर खाते व्यवस्थापन व दावे करण्याची सोय मिळेल. जोखीम तपासणी उत्तीर्ण झालेले दावे पूर्णपणे आपोआप निकाली काढले जातील. त्यामुळे दावा निकाली निघण्यासाठी आतापर्यंत लागणारे २० दिवस आता ३ दिवसांपेक्षाही कमी होऊ शकतात. दरम्यान, आधार आणि बँक खाते EPF शी जोडलेले असल्यास जुन्या निष्क्रिय खात्यातील पैसे आपोआप मिळणार आहेत. त्यामुळे अशा सदस्यांनी आपले आधार व बँक खाते EPF शी जोडलेले आहे किंवा नाही हे तातडीने तपासून घ्यावे.