EPFO Interest Rate:  कर्मचारी भविष्य निधी संघटनेने (EPFO) वित्त वर्ष २०२५-२६ साठी व्याजदर ८.२५ टक्के कायम ठेवण्याची शिफारस केली आहे. केंद्रीय विश्वस्त मंडळाच्या (CBT) २३९व्या बैठकीत हा निर्णय घेण्यात आला. केंद्रीय मंत्री मनसुख मांडविया यांच्या अध्यक्षतेखाली झालेल्या या बैठकीस केंद्रीय राज्यमंत्री शोभा करंदलाजे, कामगार व रोजगार सचिव वंदना गुरनानी आणि EPFO प्रमुख रमेश कृष्णमूर्ती उपस्थित होते.

 

पैसे खात्यात कधी जमा होणार?  (EPFO Interest Rate)

केंद्रीय विश्वस्त मंडळाच्या शिफारशीनंतर प्रस्तावित व्याजदराला अंतिम मंजुरीसाठी वित्त मंत्रालयाकडे पाठवले जाईल. मंजुरी मिळताच देशातील ७ कोटींहून अधिक EPFO खातेधारकांच्या खात्यांत व्याज जमा होण्यास सुरुवात होईल. EPF जमा रकमेवरील व्याजाची गणना दरमहा केली जाते, मात्र ती रक्कम वित्त वर्षाच्या अखेरीस खात्यात जमा केली जाते. एखादे खाते ३६ महिने निष्क्रिय राहिल्यास ते ‘डॉर्मंट’ श्रेणीत जाते आणि त्यावर व्याज मिळणे बंद होते.

मागील वर्षांचा कल – 

EPFO ने सलग दोन वर्षे ८.२५ टक्के व्याजदर कायम ठेवला आहे. वित्त वर्ष २०२३-२४ मध्ये हा दर ८.१५ टक्क्यांवरून ८.२५ टक्क्यांवर नेण्यात आला होता. २०२१-२२ मध्ये तो घसरून ८.१० टक्क्यांवर आला होता, जो चार दशकांतील नीचांक होता. त्याआधी १९७७-७८ मध्ये हा दर ८ टक्के होता.

EPFO म्हणजे काय? (EPFO Interest Rate)

EPFO म्हणजे कर्मचारी भविष्य निधी संघटना. ही केंद्र सरकारच्या कामगार व रोजगार मंत्रालयाअंतर्गत कार्यरत संस्था असून संघटित क्षेत्रातील कर्मचाऱ्यांच्या निवृत्तीनंतरच्या बचतीचे व्यवस्थापन करते. EPF, पेंशन (EPS) आणि विमा (EDLI) या तीन प्रमुख योजना ती चालवते. नोकरी सोडताना, निवृत्तीच्या वेळी किंवा विशेष परिस्थितीत ही रक्कम काढता येते. थोडक्यात, यंदा EPFO च्या व्याजदरात कोणताही बदल नसून गुंतवणूकदारांना गेल्या वर्षीइतकाच परतावा मिळणार आहे.