Imran Khan :  ‘जाने तू… या जाने ना’ या सुपरहिट चित्रपटातून रातोरात लोकप्रिय झालेल्या इम्रानच्या चाहत्यांना त्याच्या पुनरागमनाची प्रतीक्षा आहे. तब्बल १० वर्षांनंतर तो ‘अधुरे हम अधुरे तुम’ या आगामी चित्रपटातून पुन्हा एकदा प्रेक्षकांच्या भेटीला येणार आहे. अशातच त्याच्याविषयी एक धक्कादायक बातमी समोर आली आहे. मुंबईतील आंदोलनात सहभागी झाल्यानंतर इम्रानला २८ ऑक्टोबरपर्यंत भारत सोडण्याची नोटीस बजावण्यात आल्याचे वृत्त समोर आहे. त्यामुळे अभिनेता चर्चेत आला आहे.

चित्रपटाचे चित्रीकरण पूर्ण झाल्याची दिली माहिती 

इम्रान खानने ३ ऑगस्ट २०२६ रोजी ‘द हॉलीवूड रिपोर्टर इंडिया’ला दिलेल्या मुलाखतीत आपल्या आगामी चित्रपटाबाबत माहिती दिली होती. त्याने नेटफ्लिक्सच्या ‘अधुरे हम अधुरे तुम’ या रोमँटिक कॉमेडी चित्रपटाचे चित्रीकरण पूर्ण केल्याचे सांगितले. सध्या हा चित्रपट पोस्ट-प्रॉडक्शनच्या टप्प्यात असून, २०२६ च्या अखेरीस प्रदर्शित होण्याची शक्यता आहे.

या चित्रपटाबद्दलचा आनंद व्यक्त करताना इम्रानने सांगितले की, तब्बल दहा वर्षांच्या खंडानंतर त्याने एका चित्रपटाचे चित्रीकरण पूर्ण केले आहे. आपल्या वयाला आणि आयुष्याच्या सध्याच्या टप्प्याला साजेशी कथा मिळाल्याचेही त्याने नमूद केले. अनेक वर्षांपासून करायची इच्छा असलेली ही कथा असल्याने हा चित्रपट त्याच्यासाठी विशेष असल्याचे तो म्हणाला होता. ‘अधुरे हम अधुरे तुम’ या चित्रपटात इम्रान खानसोबत अभिनेता गुरफतेह पीरजादाही महत्त्वाच्या भूमिकेत दिसणार आहे.

‘जाने तू… या जाने ना’मधून मिळाली लोकप्रियता

आमिर खानचा भाचा असलेल्या इम्रान खानने बालकलाकार म्हणूनही अनेक चित्रपटांमध्ये काम केले आहे. १९८८ मधील ‘कयामत से कयामत तक’ आणि १९९२ मधील ‘जो जीता वोही सिकंदर’ या चित्रपटांमध्ये तो बालकलाकार म्हणून दिसला होता. २००८ मध्ये प्रदर्शित झालेल्या ‘जाने तू… या जाने ना’ या चित्रपटातून त्याने मुख्य अभिनेता म्हणून बॉलिवूडमध्ये पदार्पण केले. हा चित्रपट प्रचंड लोकप्रिय ठरला आणि इम्रान रातोरात स्टार झाला.

यानंतर त्याने ‘आय हेट लव्ह स्टोरीज’, ‘ब्रेक के बाद’, ‘मेरे ब्रदर की दुल्हन’, ‘एक मैं और एक तू’ आणि ‘दिल्ली बेली’ यांसारख्या चित्रपटांत काम केले. त्याच्या अभिनयाला आणि रोमँटिक प्रतिमेला प्रेक्षकांची पसंती मिळाली. ‘मटरू की बिजली का मंडोला’, ‘वन्स अपॉन अ टाइम इन मुंबई दोबारा!’, ‘गोरी तेरे प्यार में’ आणि ‘कट्टी बट्टी’ हे त्याचे अन्य चित्रपटही चर्चेत राहिले. २०१५ मध्ये प्रदर्शित झालेल्या ‘कट्टी बट्टी’नंतर इम्रान खान बॅालिवूडमधून गायब झाला. तो परत दिसलाच नाही. तो बॅालिवूडमध्ये कमबॅक करत असल्याने त्याच्या चाहत्यांमध्ये त्याच्या आगामी चित्रपटाविषयी कमालीची उत्सुकता निर्माण झाली आहे.

पुनरागमनाच्या चर्चेदरम्यान नोटीसची बातमी

इम्रान खान याने २०२६ मध्ये आलेल्या ‘हॅपी पटेल: डेंजरस डिटेक्टिव्ह’ या चित्रपटातही कॅमिओ केला होता. आता ‘अधुरे हम अधुरे तुम’मधून तो पुन्हा एकदा रोमँटिक भूमिकेत दिसणार आहे. मात्र, मुंबईतील आंदोलनानंतर त्याला २८ ऑक्टोबरपर्यंत भारत सोडण्याची नोटीस बजावण्यात आल्याच्या वृत्तामुळे विविध प्रश्नांना उधाण आले आहे.

Uddhav Thackeray: दसरा मेळाव्यासाठी शिवाजी पार्कवर ठाकरेंचीच ‘गर्जना’; उद्धवसेनेचा मार्ग मोकळा…