Elon Musk New Party । अमेरिकेच्या २४९ व्या स्वातंत्र्यदिनानिमित्त, राष्ट्राध्यक्ष डोनाल्ड ट्रम्प यांनी बहुचर्चित ‘वन बिग ब्युटीफुल लॉ’ लागू केला आहे. दरम्यान, त्यांचे माजी सहकारी आणि उद्योगपती एलॉन मस्क यांनी ‘अमेरिका पार्टी’ नावाच्या नवीन राजकीय पक्षाची स्थापना करण्याची घोषणा केली आहे. त्यांनी याविषयी बोलताना,”हा पक्ष अमेरिकेतील लोकांना पक्षीय व्यवस्थेपासून मुक्त करेल” असे म्हटले आहे. मस्क यांच्या या घोषणेनंतर अमेरिकन राजकारणात एकच खळबळ उडाली आहे.

मस्क यांनी सोशल मीडियावर नवीन राजकीय पक्षाची स्थापना करण्याची घोषणा केली आहे. त्यांच्या पोस्टमध्ये त्यांनी अलिकडच्या सर्वेक्षणाच्या निकालांचा हवाला देत, ‘आज ‘अमेरिका पार्टी’ तुम्हाला तुमचे स्वातंत्र्य परत देण्यासाठी स्थापन करण्यात आली आहे.’असे म्हटले आहे.

त्यांनी असा दावा केला की सर्वेक्षणात जनतेने २:१ च्या प्रमाणात नवीन राजकीय पर्यायाची इच्छा व्यक्त केली आहे. तुम्हाला एक नवीन राजकीय पक्ष हवा आहे आणि आता हा राजकीय पक्ष तुमच्यासमोर आहे.

पक्ष का स्थापन केला?

त्यांच्या घोषणेत मस्क यांनी सध्याच्या राजकीय व्यवस्थेवर टीका केली आणि म्हणाले, ‘जेव्हा कचरा आणि भ्रष्टाचाराने आपला देश दिवाळखोरीत काढण्याचा विचार येतो तेव्हा आपण लोकशाहीत नव्हे तर एक-पक्षीय व्यवस्थेत राहत आहोत.’ असे म्हटले. त्यांनी असेही म्हटले की, “अमेरिका पार्टीची स्थापना तुमचे गमावलेले स्वातंत्र्य परत मिळवण्यासाठी करण्यात आली आहे.”

४ जुलै रोजी अमेरिकेच्या स्वातंत्र्यदिनाच्या समारंभात मस्क यांनी त्यांच्या सोशल मीडियावर एक पोल पोस्ट केला, ज्यामध्ये त्यांनी त्यांच्या अनुयायांना विचारले – ‘स्वातंत्र्य दिन हा तुम्हाला दोन-पक्षीय (काही लोक याला एक-पक्षीय म्हणतात) व्यवस्थेपासून स्वातंत्र्य हवे आहे का हे विचारण्यासाठी सर्वोत्तम वेळ आहे! आपण अमेरिका पार्टी स्थापन करावी का?’

पोलमध्ये ६५% पेक्षा जास्त लोकांचा मस्कला पाठिंबा  

या पोलमध्ये ६५.४% लोकांनी ‘हो’ असे मत दिले, तर ३४.६% लोकांनी ‘नाही’ असे मत दिले. मस्क यांनी या जोरदार जनसमर्थनाला पक्ष सुरू करण्याची प्रेरणा म्हणून वर्णन केले आणि रिपब्लिकन आणि डेमोक्रॅटिक या दोन्ही प्रमुख पक्षांबद्दल जनतेमध्ये वाढत्या असंतोषाला प्रतिसाद म्हणून ते सादर केले.

दरम्यान ,  या अगोदर मस्क यांनी  एका पोस्टला सकारात्मक प्रतिसाद मिळाल्यानंतर अमेरिकेत तिसरा राजकीय पक्ष सुरू करण्याची शक्यता दर्शविली होती, ज्यामध्ये म्हटले होते. ‘एलॉनने तिसरा पक्ष सुरू करणे टेस्ला आणि स्पेसएक्ससारखे आहे. यशाची शक्यता कमी आहे, परंतु जर पक्ष यशस्वी झाला तर खेळ पूर्णपणे बदलेल.’

मस्क यांनी अलीकडेच ट्रम्प प्रशासनापासून स्वतःला दूर केले आहे आणि DOGE मधून बाहेर पडले आहे, अशा वेळी त्यांनी नवीन राजकीय पक्ष स्थापन करण्याची घोषणा केली आहे, ज्यामुळे त्यांच्या राजकीय आणि सार्वजनिक जीवनात महत्त्वपूर्ण बदल दिसून येत आहेत.