Elon Musk -Marco Rubio Clash | अमेरिकेचे राष्ट्राध्यक्ष डोनाल्ड ट्रम्प सत्तेत आल्यापासून अब्जाधीश इलॉन मस्क यांच्याकडे असलेल्या जबाबदाऱ्या देण्यात आल्या आहेत. मस्क यांचा अमेरिकेच्या सरकारच्या निर्णयांमध्ये महत्त्वाची भूमिका असल्याचे पाहायला मिळते. मात्र, आता यावरून सरकारमध्येच मतभेद असल्याचे दिसून आले आहे.

व्हाईट हाऊसमध्ये पार पडलेल्या मंत्रिमंडळ बैठकीदरम्यान इलॉन मस्क आणि परराष्ट्रमंत्री मार्को रुबियो यांच्यात वाद झाला झाल्याचे पाहायला मिळेल. विशेष म्हणजे हे दोघेही जण डोनाल्ड ट्रम्प यांच्यासमोरच एकमेकांना भिडल्याचे दिसून आले. रिपोर्टनुसार, सरकारी कर्मचाऱ्यांच्या कपातीवरून दोघांमध्ये वाद झाल्याचे सांगितले जाते.

सध्या मस्क यांच्याकडे डिपार्टमेंट ऑफ गर्व्हमेंट इफिशियन्सीची (DOGE) जबाबदारी आहे. या विभागाकडून अनेक मोठे आर्थिक निर्णय घेतले जात आहेत. DOGE कडून सरकारच्या अनेक विभागातील खर्च कमी करण्यासोबतच कर्मचारी कपातीचा निर्णय देखील घेण्यात आला आहे. मस्क यांच्या या निर्णयाला विरोधही पाहायला मिळत आहे. या मुद्यावरूनच  बैठकीदरम्यान इलॉन मस्क आणि परराष्ट्रमंत्री मार्को रुबियो यांच्यात वाद झाला.

मंत्रिमंडळाच्या बैठकीदरम्यान मस्क यांनी रुबियोंवर अद्याप कोणत्याही कर्मचाऱ्यांना काढून टाकले नसल्याचा तसेच कपात करण्याच्या त्यांच्या प्रयत्नांना विरोध केला जात असल्याचा आरोप केला. यावेळी रुबियो यांनी देखील मस्क यांना सडेतोड उत्तर दिले. निवृत्ती पॅकेज अंतर्गत परराष्ट्र विभागातील 1500 कर्मचाऱ्यांनी राजीनामा दिल्याचे त्यांनी सांगितले. तसेच, ‘मस्क यांना वाटते का त्या सर्वांना पुन्हा कामावर घ्यावे, जेणेकरून त्यांना पुन्हा काढून टाकण्यात आले हे दाखवता येईल?’, असे उत्तर देखील त्यांनी दिले. या बैठकीत इतर अधिकाऱ्यांकडूनही मस्क यांच्या निर्णयाबाबत तक्रार करण्यात आली.

दरम्यान, डोनाल्ड ट्रम्प यांनी मस्क आणि रुबियो यांच्यामध्ये कोणताही वाद झाला नसल्याचे म्हटले आहे. ‘मी तेथेच होतो, दोघांमध्ये कोणताही वाद झाला नाही. तुम्ही विनाकारण हा मुद्दा बनवत आहात’, असे म्हणत ट्रम्प यांनी या वादावर पडदा टाकण्याचा प्रयत्न केला. सोबतच, राष्ट्राध्यक्षांनी दोघांच्या कामाचे कौतुक देखील केले.