Electric Vehicles – औद्योगिकनगरी म्हणून ओळखल्या जाणाऱ्या पिंपरी-चिंचवड शहरात सध्या इलेक्ट्रिक व्यावसायिक वाहनांची मागणी मोठ्या प्रमाणात वाढताना दिसत आहे. पेट्रोल आणि डिझेलच्या दरातील सातत्याने होणारे चढउतार आणि पर्यावरणाबाबतची जागरूकता म्हणून ग्राहकांनी इलेक्ट्रिक वाहनांकडे मोठ्या प्रमाणावर कल दर्शविला आहे. विशेषतः लहान व्यावसायिक, डिलिव्हरी सेवा पुरवणारे, किरकोळ व्यापारी आणि लॉजिस्टिक क्षेत्रातील उद्योजक इलेक्ट्रिक वाहनांचा पर्याय स्वीकारत आहेत. गेल्या काही महिन्यांत इलेक्ट्रिक व्यावसायिक वाहनांच्या विक्रीत लक्षणीय वाढ झाली आहे. यामध्ये विशेषतः मालवाहू इलेक्ट्रिक रिक्षा, ई-कार्गो व्हॅन आणि लहान डिलिव्हरी व्हॅन यांचा मोठा समावेश आहे. पारंपरिक इंधनावर चालणाऱ्या वाहनांच्या तुलनेत इलेक्ट्रिक वाहनांचा खर्च कमी असल्यामुळे अनेक व्यावसायिकांना हा पर्याय अधिक फायदेशीर वाटत आहे. इलेक्ट्रिक वाहन खरेदी करणाऱ्या ग्राहकांची संख्या मागील वर्षाच्या तुलनेत जवळपास दुपटीने वाढली आहे. विशेषतः नवीन व्यवसाय सुरू करणारे तरुण उद्योजक इलेक्ट्रिक वाहनांना प्राधान्य देत आहेत. पिंपरी-चिंचवडमधील उद्योगधंद्यांची वाढ आणि ई-कॉमर्स क्षेत्राचा विस्तार यामुळे शहरात मालवाहतूक सेवांची मागणी मोठ्या प्रमाणात वाढली आहे. यामुळेच डिलिव्हरी सेवा देणाऱ्या कंपन्या इलेक्ट्रिक वाहनांकडे वळताना दिसत आहेत. इलेक्ट्रिक वाहनांमुळे इंधन खर्चात मोठी बचत होते, तसेच देखभाल खर्चही कमी असतो. यामुळे दीर्घकालीन दृष्टीने हा पर्याय अधिक फायदेशीर ठरत आहे. आकर्षक ऑफर्सचा वर्षाव अक्षय तृतीया या सणाच्या पार्श्वभूमीवर वाहन खरेदीसाठी शुभ मुहूर्त मानला जातो. याच संधीचा फायदा घेत शहरातील अनेक वाहन विक्रेत्यांनी ग्राहकांना आकर्षित करण्यासाठी विविध ऑफर्स जाहीर केल्या आहेत. यामध्ये कमी व्याजदरावर कर्ज, डाउन पेमेंटमध्ये सूट, तसेच मोफत अॅक्सेसरीज अशा ऑफर्सचा समावेश आहे. काही विक्रेत्यांनी तर वाहनांच्या खरेदीसोबत मोफत परवाना बॅच आणि मोफत विम्याची सुविधा देण्याची घोषणा केली आहे. “पूर्वी ग्राहकांना इलेक्ट्रिक वाहनांच्या रेंज आणि चार्जिंगबाबत शंका असायची. मात्र आता तंत्रज्ञान सुधारल्यामुळे त्या शंका दूर झाल्या आहेत. पण सध्या स्पर्धा मोठ्या प्रमाणात वाढल्यामुळे सर्वच कंपन्या वाहनांची गुणवत्ता सुधारत आहेत. त्यामुळे फास्ट चार्जिंग सुविधा आणि सुधारित बॅटरीमुळे ग्राहकांचा विश्वास वाढला आहे.” – सुनील बर्गे, माजी अध्यक्ष, पिंपरी-चिंचवड मोटर ड्रायव्हींग स्कूल
